नेपाल पत्रकार महासंघ इलाम शाखाले पत्रकारका लागि आपतकालीन समयमा आर्थिक सहयोग गर्ने उद्देश्यले ५० हजार रुपैयाँको राहत कोष स्थापना गर्ने निर्णय गरेको छ ।

महासंघको आज बसेको बैठकले तत्काल रु. ५० हजारको राहत कोष स्थापना गर्ने र पछि रकम बढाउँदै लैजाने निर्णय गरेको महासंघका सचिव ख्याम भुजेलले जानकारी दिए । कोष निर्माण गर्न शाखा अध्यक्ष कोकिला ढकालको अध्यक्षतामा उपसमिति गठन गरिएको छ ।

बैठकले वार्षिक रूपमा मेचीका उदीयमान पत्रकारलाई वितरण गरिँदै आएको आशिष स्मृति पुरस्कार कोष पनि रु. एक लाखको बनाउने निर्णय गरेको छ । हाल कोषमा रु. ६० हजार रहेको छ ।