सत्तारुढ नेपाल कम्युनिस्ट पार्टीका नेतृले नै बलात्कारजस्ता जघन्य अपराधका घटनाका पीडकलाई फाँसीको सजाय दिने व्यवस्था गर्न गृहमन्त्री रामबहादुर थापासँग माग गरेका छन् ।

गृहमन्त्री थापासँग सामूहिक भेट गरी उनीहरूले महिला तथा बालबालिकामाथि हुने हत्या, बलात्कारलगायतका जघन्य अपराधका घटना हुनै नदिन आवश्यक कदम पनि चाल्न माग गरे ।

शुक्रबार बिहान उनीहरूले पीडितलाई न्याय र पीडकलाई फाँसीको सजाय दिने व्यवस्था गर्न माग गर्दै गृह मन्त्रालय पुगेर गृहमन्त्री थापालाई ध्यानाकर्षणपत्र पनि बुझाए ।

नेपाल कम्युनिस्ट पार्टी (नेकपा) की नेतृ तथा प्रदेश ३ की सांसद अष्टलक्ष्मी शाक्यले महिला तथा बालिकामाथि हुने गरेका हत्या, बलात्कारलगायतका जघन्य अपराधका घटना हुनै नदिने गरी ठोस कदम चाल्न गृहमन्त्री थापालाई ध्यानाकर्षणपत्र बुझाएको बताइन् । सो अवसरमा शाक्यले सरकारले महिलामाथि हुने जघन्य अपराधका घटना नियन्त्रण गर्न नसकेकोले आफैँ लज्जित हुने अवस्था आएको गुनासो पनि गरिन् ।

महिला नेतृहरूसँग गृहमन्त्री थापाले महिला र बालबालिकामाथि यस्ता प्रकारका घटना हुन नदिन सरकार जिम्मेवार ढंगले लागिपरेको बताए । महिला तथा बालिकामाथि हुने हत्या, बलात्कारलगायतका ९० प्रतिशत घटनाको छानबिन गरी दोषीलाई कारबाही गरिएको र निर्मला पन्तलगायतका घटनाका दोषीलाई पनि छिट्टै कानुनी कठघरामा उभ्याउने आश्वासन सो अवसरमा गृहमन्त्री थापाले दिए ।