दुई महिनाअघि बलात्कारपछि हत्या गरिएकी कञ्चनपुरकी १३ वर्षीया बालिका निर्मला पन्तको वास्तविक हत्यारा पत्ता लगाएर सार्वजनिक गर्न माग गर्दै आज (मंगलबार) नेपाल विद्यार्थी संघले कञ्चनपुर बन्द गरेको छ ।

सरकारले पन्तको हत्यारा पत्ता लगाई सार्वजनिक गर्न ढिलाइ गरेको भन्दै नेविसंघले कञ्चनपुर बन्दको आह्वान गरेको हो । नेविसंघका कार्यकर्ताले बिहान ७ बजेदेखि नै पूर्वपश्चिम महेन्द्र राजमार्गलगायत जिल्लाका विभिन्न ठाउँमा टायर बालेर प्रदर्शन गरेका छन् ।

नेविसंघ गरेको बन्दको असर शिक्षण संस्था, कलकारखाना, उद्योग, बजार सबै क्षेत्रमा परेको छ । बन्द बिहान ७ बजेदेखि साँझ ५ बजेसम्म रहने बन्दकर्ताले जनाएका छन् ।

बन्दको अवज्ञा गरेको भन्दै बन्दकर्ताले सरकारी कार्यालयमा तोडफोड पनि गरेका छन् । जिल्ला प्रहरी कार्यालय कञ्चनपुरका अनुसार जिल्ला समन्वय समिति, जिल्ला प्राविधिक कार्यालय र सरकारी वकिल कार्यालयमा तोडफोड गरिएको छ । तोडफोडका कारण कार्यालयभित्र राखिएका फर्निचरमा समेत क्षति पुगेको छ ।

बन्दकर्ताले बा.२ झ २७१५ नम्बरको सरकारी गाडीको फुटाएका छन् । सरकारी वकिलको कार्यालय तोडफोड गरिरहेको तस्बिर खिचिरहेका सञ्चारकर्मीमाथि पनि आन्दोलनकारीले हातपात गरेका छन् । जिल्ला प्रहरी कार्यालय कञ्चनपुरले सरकारी कार्यालय, सवारीसाधन र पत्रकारमाथि आक्रमण गर्नेको खोजी भइरहेको जानकारी दिएको छ ।