कैलालीको अत्तरिया बजारमा बिक्री–वितरण गर्न ल्याइएका कान्तिपुर दैनिक, काठमाडौं पोष्ट, नागरिक दैनिक पत्रपत्रिकाको पोकोमा अज्ञात समूहले आज बिहान आगो लगाएर नष्ट गरेको छ ।

नेपालगञ्जबाट बिहान अत्तरिया बजारको बिक्री केन्द्रमा पुगेको पत्रिका बोकेको जिपमा रहेका पत्रिका निकालेर चार–पाँचजनाको समूहले आगो लगाई नष्ट गरेको जनाइएको छ ।

नेपाल पत्रकार महासंघ कैलालीले पत्रपत्रिकामा आगजनी गरिएको घटनाप्रति आपत्ति जनाउँदै घटनामा संलग्नको खोजी गरी कडा कारबाही गर्न माग गरेको छ ।

महासंघले जारी गरेको विज्ञप्तिमा आमनागरिकलाई सुसूचित हुने अधिकारबाट वञ्चित हुने गरी पत्रिका जलाइएको यो घटना प्रेस स्वतन्त्रतामाथिको आक्रमण भएको जनाएको छ ।