पेप्सीकोला टाउनप्लानिङस्थित करिअर विल्डिङ इन्टरनेसनल एकेडेमीले कीर्तिमानी धावक वैकुण्ठ मानन्धरलाई ‘करिअर खेलाडी सम्मान २०७५’ प्रदान गर्ने घोषणा गरेको छ ।

विद्यालयका संस्थापक अध्यक्ष तेज श्रेष्ठका अनुसार धावक मानन्धरलाई ११ हजार १ सय ११ रुपैयाँ राशि र ताम्रपत्रसहितको ‘करिअर खेलाडी सम्मान २०७५’ प्रदान गर्ने निर्णय गरिएको हो ।

विगत ५५ वर्षदेखि निरन्तर दौडिँदै आएका चर्चित धावक मानन्धरको दौडप्रतिको लगावको उच्च सम्मान गर्दै ‘करिअर खेलाडी सम्मान २०७५’ प्रदान गर्ने निर्णय गरिएको अध्यक्ष श्रेष्ठले बताए ।

विद्यालयले यसअघि राष्ट्रिय गानका रचनाकार प्रदीपकुमार राई (व्याकुल माइला) लाई ‘करिअर स्रष्टा सम्मान’ बाट सम्मानित गरेको थियो भने नेपाली क्रिकेट टोलीका उपकप्तान ज्ञानेन्द्र मल्ललाई पनि सम्मान गरेको थियो ।

करिअरले स्रष्टाको साथै खेलाडीलाई पनि सम्मान गर्ने परम्परालाई निरन्तरता दिँदै भविष्यमा विशिष्ट कलाकारलाई पनि सम्मान गरिने प्रिन्सिपल हेम राईले बताए । विद्यालयले यसै महिनाको अन्त्यमा एक विशेष समारोहबीच धावक मानन्धरलाई सो सम्मान दिने तय गरेको छ ।