चार सय केभी विद्युत प्रसारण लाइनका लागि निर्माण भइरहेको विद्युतीय टावरको ५० प्रतिशत काम सम्पन्न भएको छ । विश्व बैंकको रु. पाँच अर्ब २० करोडको लागतमा सो काम भइरहेको छ ।

नेपाल विद्युत प्राधिकरणमार्फत ठेक्कामा एआईएल भारत तथा एलटीबी जर्मनीद्वारा संयुक्त रूपमा निर्माण भइरहेको हेटाँैडादेखि इनरुवासम्मको २८५ किलोमिटर क्षेत्रमा ८९२ विद्युत टावर निर्माण भइरहेका छन् । हालसम्म ४६० टावर निर्माण भएका छन् । दुवै निर्माण कम्पनीबीच ३० महिनाभित्र ८९२ टावर निर्माण सम्पन्न गर्न सन् २०१३ अप्रिल दुईमा सम्झौता भएको थियो ।

हेटौँडादेखि इनरुवासम्म प्रत्येक ४०० मिटरको दूरीमा विद्युत प्रतिरोधात्मक टावर निर्माण भइरहेको एआईएल कम्पनीका प्रमुख प्रबन्धक दिनेशमान चन्द्राले बताए । खम्बा बनाउन जमिनको नक्सांकन, जंगलमा रुख कटानी, मुआब्जा वितरणलगायत काममा स्थानीय प्रशासनको ढिलासुस्ती र राजनीतिक असहयोग तथा भूकम्प तथा बाढीपहिरोका कारणले ढिलाइ भएको उनको भनाइ छ । समयमै प्रसारण लाइनको टावर निर्माण गर्न मुख्य ठेक्केदार कम्पनीले पिलर बनाउनका लागि १५ टावर ठड्याउन आठ कम्पनीलाई जिम्मा दिएको छ । ती कम्पनीले समयमै सम्पन्न गर्न तीव्र रूपमा काम गरिरहेका छन् । एउटा टावरको उचाइ ४५ मिटरदेखि ७० मिटरसम्म तथा २५ वर्ग मिटरदेखि ४७ वर्ग मिटरसम्म जग्गा आगटेको छ ।