नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा)ले आज आयोजना गर्न लागेको कार्यक्रम प्रदर्शनी मार्गस्थित सडकमै हुने भएको छ । यसअघि खुल्ला मञ्च (रत्नपार्क)मा कार्यक्रम गर्ने भनिएको थियो तर अन्तिममा आएर कार्यक्रमस्थल परिवर्तन गरिएको हो ।

पार्टीले आफ्नो पाँचौँ पुनर्गठन दिवसका अवसरमा विशाल जनसभा आयोजना गरेको हो । सभामा करिब १ लाख कार्यकर्ता तथा समर्थक उतार्ने दाबी गरिएको छ । यसका लागि शुक्रबारदेखि नै पर्चा र पोस्टरिङलाई व्यापकता दिइएको थियो भने आज बिहानै मञ्च झकिझकाउ पारिएको छ ।

यसअघि यसअघि जनसभा पार्टी महासचिव नेत्रविक्रम चन्द ‘विप्लव’ले नै मुख्य रुपमा सम्बोधन गर्ने बताइएको थियो । तर उनी आउने निश्चित नभएकाले प्रवक्ता प्रकाण्डले मुख्य सम्बोधन गर्ने बताइएको छ ।

खुलामञ्च अर्थात रत्नपार्क आफैमा खुल्ला नरहेकोले सडकमा कार्यक्रम गर्न लागिएको नेकपाले जनाएको छ । हाल रत्नपार्कको आधा भाग बसपार्कले ओगटेको छ भने आधा भागमा दरबार हाइस्कुलका विद्यार्थीहरु पढ्ने टहरा बनाइएको छ ।

आज दिनभरि नै प्रदर्शन मार्ग हुँदै चल्ने सवारी साधन ठप्प हुनेछन् । बाटो दुवैतर्फ बन्द गरिएको छ । सरकारले नेकपाको कार्यक्रमलाई मध्यनजर गर्दै काठमाडौंका मुख्य स्थान र सभास्थल नजिक सुरक्षकर्मी तैनाथ गरेको छ ।