एशिया प्यासिफिक सम्मेलनमा सहभागी हुन आएका विभिन्न देशका राष्ट्रप्रमुख तथा सरकार प्रमुखले प्रधानमन्त्री केपी शर्मा ओलीसँग भेटवार्ता गरेका छन् ।
प्रधानमन्त्री ओलीसँग आज इरानका पूर्वउपराष्ट्रपति हसन गाफोरी फार्डले शिष्टाचार भेटवार्ता गरे ।

भौगोलिक रुपमा नजिकै रहेको मित्रराष्ट्र भएकाले एकअर्काको साझा चासो र हितका विषयमा नेपाल र इरानका दुई नेताबीच छलफल भएको बताइएको छ । उनीहरुबीच आइक्यापलाई प्रभावकारी बनाउने र सक्रियतापूर्वक अगाडि बढाउने विषयमा महत्वपूर्ण छलफल भएको प्रधानमन्त्रीका परराष्ट्र सल्लाहकार राजन भट्टराईले जानकारी दिए ।

आइक्यापमा एशिया प्रशान्त क्षेत्रका २०० भन्दा बढी देशका सत्तारुढ र प्रमुख पार्टी सदस्य रहेकाले यसलाई थप प्रभावकारी बनाउन एकआपसमा मिलेर काम गर्ने विषयमा समेत उनीहरुबीच छलफल भएको बताइएको छ ।

यस्तै प्रधानमन्त्री ओलीसँग सामुआका अफिओगा टुइमालिआलिफानो भालेतोआ सुआलौभी द्वितीय र उनकी धर्मपत्नीले पनि आजै शिष्टाचार भेटवार्ता गरेका छन् ।

भेटका अवसरमा उनीहरुबीच जलवायु परिवर्तनले पारेको नकारात्मक प्रभावलाई कसरी कम गर्न सकिन्छ भन्नेबारेमा छलफल भएको थियो । जलवायु परिवर्तनका कारण नेपालको हिमाली क्षेत्रमा हिउँ पग्लिइरहेको र तटीय क्षेत्रका देशसमेत समस्यामा पर्दै गएकाले त्यसलाई न्यूनीकरण गर्न मिलेर जाने विषयमा महत्वपूर्ण छलफल भएको राससले जनाएको छ ।

यस्तै प्रधानमन्त्री ओली र नाउरका राष्ट्रपति बारोना दिभाभेसी बाक्वाबीच पनि आजै शिष्टाचार भेटवार्ता भएको छ । भेटका अवसरमा उनीहरुबीच दुई देशबीच कूटनीतिक सम्बन्ध स्थापना गर्ने, जलवायु परिवर्तन तथा दुई देशका साझा विषयमा समान धारणाका साथ अन्तर्राष्ट्रिय मञ्चमा प्रस्तुत हुने विषयमा कुराकानी भएको थियो ।

एशिया प्यासिफिक सम्मेलनको दुईवटा महत्वपूर्ण विषय जलवायु परिवर्तन र अन्तर्राष्ट्रिय शान्ति भएकाले सोही विषयमा नै प्रधानमन्त्री ओलीले भेटवार्ताका क्रममा जानकारी गराएका थिए ।