भारतको गणतन्त्र दिवसका अवसरमा आयोजना गरिने विशेष समारोहको प्रमुख अतिथि दक्षिण अफ्रिकाका राष्ट्रपति सिरिल रामाफोसा बन्ने भएका छन् ।
आउँदो जनवरी २६ का दिन हुने ७०औँ गणतन्त्र दिवस समारोहका प्रमुख अतिथि रामाफोसा हुने प्रधानमन्त्री नरेन्द्र मोदीले ट्विटरमार्फत जानकारी दिएका हुन् । मोदीले रामाफोसालाई औद्योगिक राष्ट्रहरूको समूह जी–२० शिखर सम्मेलनका क्रममा भेटेर प्रमुख अतिथिका रूपमा उपस्थित भइदिन अनुरोध गरेको बताइन्छ ।
दक्षिण अफ्रिकासँग महात्मा गान्धीको विशेष र नजिकको सम्बन्ध भएकाले त्यही देशका राष्ट्रपतिलाई प्रमुख अतिथि बनाउन लागेको मोदीले बताएका छन् । भारतमा राष्ट्रपिताका रूपमा सम्मान गरिने गान्धीले सन् १८९३ देखि १९१४ सम्म दक्षिण अफ्रिकामा बिताएका थिए । दक्षिण अफ्रिकामा रहँदा गान्धीले अधिवक्ताको रूपमा काम गरेका थिए ।
भारतमा भएको अहिंसा आन्दोलनको योजना पनि गान्धीले दक्षिण अफ्रिका रहँदै बनाएका थिए । काला जातिका मानिसलाई गोरा जातिका मानिसले गरेको भेदभावबाट रुष्ट भएर उनले भारतमा अंग्रेज शासनविरुद्ध अहिंसात्मक आन्दोलन शुरु गरेको बताइन्छ ।
भारतले अर्को वर्ष गान्धीको १५०औँ जन्मजयन्ती मनाउन लागेको छ । यसअघि भारतले अमेरिकी राष्ट्रपति डोनाल्ड ट्रम्पलाई गणतन्त्र दिवस समारोहमा प्रमुख अतिथिका लागि आमन्त्रण गरे पनि समय अभाव जनाउँदै उपस्थित हुन नसक्ने बताएका थिए ।
प्रतिक्रिया