चिकित्सा शिक्षाको सुधारको माग गर्दै अनशनमा बसेका डा. गोविन्द केसीको स्वास्थ्यमा समस्या भएपछि सोमबार बिहान जिल्ला अस्पताल इलाममा भर्ना गरिएको छ । १६औँ पटकको अनशनको छैटौँ दिन आजसम्ममा डा. केसीको स्वास्थ्यस्थिति गम्भीर बन्दै गएपछि उनलाई जिल्ला अस्पतालमा भर्ना गरिएको हो ।

डा. केसीको रक्तचाप बढ्नुका साथै फोक्सोमा संक्रमण बढ्दै गएको र मुटुको गति पनि अनियमित भएर शिथिल भएपछि अस्पताल भर्ना गरिएको डा. केसीका वार्ताटोली सदस्य अधिवक्ता डा. सुरेन्द्र भण्डारीले बताए । अस्पताल भर्ना गरिए पनि डा. केसीले औषधि सेवन गर्न भने मानेका छैनन् ।

वार्ताटोली सदस्य भण्डारीले डा. केसीको अवस्था नाजुक बन्दा पनि सरकारले वास्ता नगरेको बताए । डा. केसी चिकित्सा शिक्षा विधेयक जनताका पक्षमा हुनुपर्ने, १५औँ अनशनका क्रममा सरकारले गरेको सहमति कार्यान्वयन हुनुपर्नेसहितका ६ बुँदे माग राखेर इलाममा यही पुस २५ गतेदखि अनशन बसेका छन् ।