फिलिपिन्सको दक्षिणी क्षेत्रमा अवस्थित एक चर्चमा आइतबार बिहान भएको विस्फोटमा परी २७ जनाको मृत्यु भएको छ ।

फिलिपिन्सको राष्ट्रिय प्रहरीका प्रमुखले देशको दक्षिणी क्षेत्रमा पर्ने सुलु प्रान्तको चर्चमा आइतबार बिहान एकैसाथ दुईवटा विस्फोटन भएको जानकारी दिए । प्रहरी प्रमुख ओस्कार अल्बायाल्डेका अनुसार मृत्यु भएकामध्ये अधिकांश फिलिसिन्सका सैनिक रहेका छन् ।

उनले विस्फोटनमा परी अरू ७७ जना घाइते भएका र उनीहरूको उपचार भइरहेको पनि जानकारी दिए ।
दुवै विस्फोटन स्थानीय समयअनुसार बिहान करिब ८ः१५ बजेतिर दक्षिणी क्षेत्रको जोलो चर्चमा भएको बताइएको छ ।

उक्त चर्चमा एउटा बम बाहिर र अर्को चर्चभित्र गरी एक मिनेटको फरकमा ती दुई बम विस्फोट भएको अल्बायाल्डेले बताए । यस दुर्घटनामा परेकाहरूमा अधिकांश नियमित रूपमा चर्च जाने गरेकाहरू रहेका पनि प्रहरीले जानकारी दिएको छ ।

‘चर्चमा प्रार्थनाका बेला भएको विस्फोटको हामी घोर भत्र्सना गर्दछौँ, सैन्य अधिकारीहरू र आमनागरिक मारिएका र घाइते भएका छन्, त्यो निकै दुःखद् छ,’ फिलिपिन्सका रक्षा सचिव डल्फिन लोरेन्जानले बताए ।

उनले घटनाका पीडितहरूलाई तत्काल राहत तथा उद्धारका लागि सहयोग गर्न पनि निर्देशन दिइएको बताए । घाइतेमध्ये केहीको अवस्था चिन्ताजनक रहेको र घटनाको विवरण संकलन भइरहेकोले मृत्यु हुनेहरूको संख्या अझै बढ्न सक्ने अधिकारीहरूले जानकारी दिएका छन् ।