बंगलादेशमा विश्व प्रसिद्ध ट्रेडमार्कका लागि कपडा सिलाउने तर निम्न ज्यालामा काम गर्दै आएका श्रमिकले हडतालमा सामेल भएको आरोपमा करिब पाँच हजारजनाको रोजगारी गुमेको प्रहरीले मंगलबार जनाएको छ ।
जनवरीमा उचित ज्यालादर कायम गर्न माग गर्दै आन्दोलनमा सहभागी भएका कारण उनीहरूको रोजगारी गुमेको हो । केही दिनदेखि जारी हडतालमा देशभरबाट हजारौँको संख्यामा सहभागी भएपछि करिब ३० अर्ब अमेरिकी डलर लगानीमा सञ्चालनमा रहेको कपडा उद्योगमा काम अवरुद्ध भएको थियो ।
बंगलादेशको असुलियामा कपडा सिलाइसम्बन्धी कम्पनीहरू एच एन्ड एम, वालमर्टलगायतका कम्पनीविरुद्ध भएका प्रदर्शनका क्रममा भएका झडपमा एकजनाको मृत्यु भएको छ भने ५० जनाको घाइते भएका छन् । प्रदर्शन चर्किँदै गर्दा भएका झडपका क्रममा हजारौँ कामदारले उद्योग तथा तीसँग सम्बद्ध संस्थाबाट सामानहरू लुटेको र तोडफोड गरेको आरोपसँगै उनीहरूलाई उद्योगले हटाएका समाचार बाहिर आएका छन् ।
तर, श्रमिकहरूको संगठन ट्रेड युनियनले उद्योगले कामदारलाई अनावश्यक धम्की तथा कानुनी कारबाही गर्ने चेतावनीसमेत दिएको बताएका छन् । ‘अहिलेसम्म कपडा उद्योगले चार हजार ८९९ कामदारलाई आन्दोलन गरेको आरोपमा जागिरबाट निकालेको छ,’ एक प्रहरीले नाम गोप्य राख्ने सर्तमा बताए ।
बंगलादेशको एउटै गार्मेन्टमा काम गर्दै आएका र महिनावारी ९५ अमेरिकी डलर आम्दानी रहेका एक हजार २०० भन्दा बढी कामदारलाई हटाइएको युनियनको दाबी छ । ट्रेड युनियनले कामबाट हटाइएका कामदारको संख्या करिब सात हजार पुगेको र करिब १०० जनालाई पक्राउ गरिएको बताएका छन् ।
तर इन्डस्ट्री अल बंगलादेश काउन्सिलका महासचिव सलाउद्दिन सापोनले भने युनियनको आह्वानमा आन्दोलनमा सहभागी भएका कामदार डरले आफैँ काममा नफर्किएको बताए ।
करिब तीन हजार कामदार, जो उद्योगविरोधी गतिविधिमा सहभागी बने, विरुद्ध विभिन्न मुद्दा दर्ता भएका र धेरैले उद्योगमा नफर्किने निर्णय गरेका छन्– उनले बताए । मुलुकभर प्रहरी नियन्त्रणमा लिइएका भनिएका कामदारबारे प्रहरीले कुनै प्रतिक्रिया दिन मानेन । बंगलादेशमा करिब चार हजार ५०० कपडा सिलाउने फ्याक्ट्री रहेका छन् जहाँ करिक ४१ लाख कामदारले रोजगारी पाइरहेका छन् । बंगलादेश विश्वभर तयारी कपडा निर्यातका लागि चीनपछि पहिलो स्थानमा आउँछ ।
प्रतिक्रिया