श्रीलंकाले राजधानी कोलम्बोबाट क्यान्डी सहर जोड्ने राजमार्ग निर्माणका लागि चीनसँग एक अर्ब डलर ऋण सहयोगका लागि आग्रह गरेको छ ।

श्रीलंकासँग विदेशी मुलुकलाई यसै वर्ष मात्र करिब ६ अर्ब अमेरिकी डलर ऋण भुक्तानी गर्नुपर्ने दायित्व छ । अर्थ मन्त्रालयका प्रवक्ता एम.आर. हसनले राजमार्ग निर्माणसम्बन्धी ऋणका सर्तहरू स्वीकृत हुने अपेक्षा गरिरहेको बताए । श्रीलंकाले हालैका वर्षहरूमा चीनबाट सबैभन्दा बढी ऋण प्राप्त गरिरहेको छ ।

राष्ट्रपति मैत्रीपाला सिरिसेनाको सरकारले विपक्षी महिन्दा राजापाक्षले मुलुकलाई चिनियाँ ऋणको जालोमा पारेको आरोप लगाउँदै आएको छ । तर, आर्थिक दबाब झेल्दै आएको वर्तमान सरकारले पुनः चीनसँग ठूलो परिमाणमा ऋण लिन लागेको छ ।

चीनसँगको निकटतालाई लिएर राष्ट्रपति सिरिसेना र प्रधानमन्त्री रनिल विक्रमासिंघेबीच राजनीतिक द्वन्द्व चर्किएको थियो ।