उत्तर कोरियाली नेता किम जोङ उनको आगमनका लागि सोमबार भियतनाम–चीनको सीमावर्ती शहर दोङदाङमा सुरक्षा व्यवस्था कडा बनाइएको छ ।

सोमबार भियतनामको सीमावर्ती शहर दोङदाङ पुग्दै गरेका किमको सुरक्षार्थ सर्वसाधारणका लागि त्यहाँका केही निश्चित क्षेत्रमा रेल सेवा बन्द गरिएको एएफपीले जनाएको छ ।

अमेरिकी राष्ट्रपति डोनाल्ड ट्रम्पसँग भेटवार्ताका लागि भियतनाम पुग्दै गरेका किम सवार हुने रेलमार्ग तथा रेल स्टेसनमा विशेष सुरक्षा व्यवस्था गरिएको र ती क्षेत्रलाई सेनाले घेरा हालिरहेको छ ।

उत्तर कोरियाली नेता किम उत्तर कोरियादेखि नै रेलमार्गबाट भियतनाम पुग्दै छन् । दोङदाङबाट किमलाई सडक मार्गबाट करिव १७० किलोमिटर मोटरमा राखेर भियतनामको राजधानी हनोई लगिने छ। हनोई यात्राका क्रममा उक्त सडकखण्ड पूरै बन्द गरिने बताइन्छ ।

किम शनिबार नै रेल चढेर भियतनामतर्फ लागेका हुन् । उनी चीनको राजधानी बेइजिङ हुँदै रेलमा भियतनाम पुग्नेछन्। भियतनामका अधिकारीहरुले जनाएअनुसारमङ्गलबार बिहानसम्ममा किम भियतनामको दोङदाङ शहरमा पुग्नेछन् । साढे दुई दिन लगाएर करिब ४ हजार किलोमिटर यात्रा गर्दै उनी भियतनाम पुग्न लागेका हुन् ।

भियतनाम दोङदाङ शहर चीनसँगको सीमा क्षेत्रमा पर्दछ । त्यसैले पछिल्ला केही दिनयता उक्त क्षेत्रमा कडा सुरक्षा व्यवस्था अपनाइएको छ । भियतनाम सरकारको विशेष सुरक्षासहितको सवारी साधनमा अपरान्ह २ बजे उनी भियतनामको राजधानी हनोई पुग्ने कार्यक्रम रहेको छ ।

दोङदाङ शहरको रेलसेवा सर्वसाधारण नागरिकको लागि बन्द गरिएको दृश्य आफ्ना समाचारदाताले देखेको एएफपीको भनाई छ । मंगलबारसम्म रेल सेवा बन्द हुन सक्ने पनि बताइएको छ ।

उत्तर कोरियाली नेता किम अमेरिकी राष्ट्रपति ट्रम्पसँगको दोस्रो चरणको उच्चस्तरीय वार्ताका लागि हनोइ जान लागेका हुन् । गत वर्षको जुन १२ मा सिंगापुरमा दुई नेताबीच बहुचर्चित भेटघाट भएको थियो । अब हनोइमा यही फेब्रुअरी २७ र २८ मा भेटवार्ता हुने कार्यक्रम छ । अमेरिकी राष्ट्रपति ट्रम्प पनि मङ्गलबार नै हनोई पुग्दैछन् ।