–छविलाल बगाले
सडक छेउका पेट्रोलपम्प हटाउने महानगरको तयारीले व्यवसायी आतंकित छन् । कुनै छलफल नै नगरी चालिएको कदम सफल नहुने निष्कर्ष व्यवसायीको छ । महानगर मापदण्ड नभएका पम्पलाई हटाएरै छाड्ने बताइरहँदा निगमले भने आपूर्तिमा समस्या हुने निष्कर्षमा पुगेको छ ।

राजधानीमा संचालित डेढ दर्जन पेट्रोलपम्प हटाउने काठमाडौं महानगरपालिकाको तयारी छ । सडक छेउमै खोलिएका १५ वटा पेट्रोलपम्पले ट्राफिक जाम गराएको र मानवीय क्षति बढेको निष्कर्ष निकाल्दै महानगरले पम्प हटाउन नेपाल आयल निगम लिमिटेडलाई पत्र काटेको छ । महानगरले ट्राफिक प्रहरी, आयल निगम, सडक विभाग र उद्योग मन्त्रालयका प्रतिनिधीलाई बोलाएर सडक छेउका पप्प हटाउन सहयोग मागेको छ । पेट्रोलपम्पका कम्पाउन्ड कम रहेकाले तेल भर्ने सवारी साधनको लाइन सडकसम्म पुगेर ट्राफिक जाम भएको देखिएपछि हटाउने निर्णय गरेको काठमाडौं महानगरपालिकाका प्रवक्ता
ईश्वरमान डंगोलको दावी छ ।

महानगरले टेकुमा रहेको कनक पेट्रोलपम्प, सोल्टीमोडको सीता पेट्रोलपम्प, बालाजुको कोतधुकु पेट्रोलपम्प, त्रिपुरेश्वरका जयन्ती र मायाराम भोलाराम, कलङ्कीका बाबा, श्यामा र त्रिशूल पेट्रोलपम्प, गैरीगाउँको भ्याली रिकेस पेट्रोलपम्प, जडीबुटीको कामाख्या पेट्रोलपम्प, जोरपाटीका जुबी र बराल पेट्रोलपम्प, दमकलचोकको एचपी इन्टरनेसनल इन्क, एकान्तकुनाको गायत्री पेट्रोलपम्प तथा महाराजगङ्जको सीता पेट्रोलपम्पलाई तत्काल हटाउने निर्णय गरेको होे ।

आयल निगम सडक छेउमा संचालित पम्पका कारण दुर्घटना बढेको स्वीकार गर्छ । तर एकैपटक १५ वटा पम्प विस्थापित गर्दा उपभोक्तामा ठूलो असर पर्ने निगमको भनाई छ । हटाउन लागिएका पम्पले मात्रै प्रतिदिन ६६ हजार लिटर इन्धन वितरण गर्दै आएका छन् । त्यसो त पछिल्ला ५ बर्षमा उपत्यकामा नयाँ पम्प स्थापनाको लागि आवेदनसम्म परेको छैन् । नयाँ नबन्ने र भएका पम्पलाई पनि एकसाथ हटाउँदा बजारमा इन्धन आपूर्तिमा समस्या आउने निगमका प्रवक्ता बिरेन्द्र गोइतको निष्कर्ष छ ।

पेट्रोलपम्प व्यवसायीले पनि महानगरको कदमप्रति बिरोध जनाएका छन् । ब्यवसायीसँग कुनै छलफल नगरी आफूखुसी पम्प हटाउन खोज्नु राम्रो कदम नभएको भन्दै आक्रोश ब्यक्त गरेका छन् । बर्षौं पूराना पम्प हटाउने महानगरको निर्णयले उपत्यकामा इन्धन आपूर्तिमा समस्या थपिने पेट्रोलियम डिलर राष्ट्रिय संघका अध्यक्ष लिलेन्द्रप्रसाद प्रधान बताउँछन् ।

विगत ५ बर्षको तथ्यांकलाई हेर्ने हो भने बार्षिक १२ प्रतिशतका दरले पेट्रोलियम पदार्थको बिक्रिवितरण बढेको छ । अहिले नयाँ पेट्रोलपम्प खोल्न महँगो हुँदै गएको छ । संचालकहरु पनि अन्य व्यवसायमा पलायन हुन थालकोले जोखिममा पर्दै गइरहेको यो ब्यवसायलाई महानगरले थप जोखिममा पु¥याएको व्यवसायीको आरोप छ ।