राष्ट्रिय खेलकुद परिषदले तेक्वान्दोका पूर्व मुख्य प्रशिक्षक तथा राष्ट्रिय टीम तयारी समितिका उप–निर्देशक ध्रुवबहादुर गुरुङलाई निर्देशकको जिम्मेवारी दिएको छ ।

राखेपका सदस्यसचिव केशवकुमार विष्टले गुरुङलाई राष्ट्रिय टीम तथा तयारी समितिको जिम्मेवारी दिएका हुन् । आज (जेठ १६) नै गुरुङलाई निर्देशकको जिम्मेवारीको आधिकारिक पत्र दिइएको छ ।

पत्रमा जेठ १४ गते रिक्त भएको निर्देशकको पदमा समान पद तथा श्रेणी कायम रहनेगरी जेठ १७ गते बिहीबारदेखि राष्ट्रिय टीमको तयारी समितिको निर्देशकको जिम्मेवारी तोकिएको व्यहोरा उल्लेख गरिएको छ ।

त्यस्तै, राष्ट्रिय टीम तयारी समितिका निर्देशक अर्जुनबहादुर बिकलाई तालिम तथा प्रशिक्षण विभागको निर्देशकको जिम्मेवारी दिइएको छ । बिकलाई पूर्व तालिम तथा प्रशिक्षण विभाग प्रमुख रिम रानाभाटको स्थानमा पदस्थापन गरिएको हो । रानाभाटले उमेर हदबन्दीका कारण जेठ १४ गते मंगलबार अवकास प्राप्त गरेका थिए ।