डुबेर मृत्यु भएका आप्रवासी बाबुछोरीको दाहसंस्कार

डुबेर मृत्यु भएका आप्रवासी बाबुछोरीको दाहसंस्कार


मेक्सिको–अमेरिका सीमानदी रियो ग्रान्डेमा डुबेर मृत्यु भएका ओस्कार मार्टिनेज र उनकी २३ महिनाकी छोरी भ्यालेरीको एलसाल्भाडोरमा सोमबार दाहसंस्कार गरिएको छ । अवैध आप्रवासीका रूपमा संयुक्त राज्य अमेरिका प्रवेश गर्नेक्रममा सीमानदी रियो ग्रान्डेमा डुबेर उनीहरू दुवैको गत जुन २३ मा मृत्यु भएको थियो । उनीहरू मध्यअमेरिकी मुलुक एलसाल्भाडोरका स्थायी बासिन्दा हुन् ।

साल्भाडोरका सञ्चारमाध्यमका अनुसार एलसाल्भाडोरको राजधानी सानसाल्भाडोरबाट दक्षिणस्थित ला बारमेजा समाधिस्थलमा पारिवारिक कार्यक्रमबीच उनीहरू दुवैको दाहसंस्कार गरिएको हो । परिवारका सदस्यहरूको अनुरोधमा त्यस अवसरमा विशेष कार्यक्रम केही राखिएको थिएन । सञ्चारमाध्यमहरूका अनुसार करिब ५० जना शोकाकुल आफन्तले मृत व्यक्तिको सम्झनामा सेतो पुष्पगुच्छा अर्पित गरेका थिए ।

ओस्कार र भ्यालेरीको गत जुन २३ मा मृत्यु भएको थियो । अमेरिकी सीमा सुरक्षा अधिकारीहरूले दुवैको शव रियो ग्रान्डे नदीको मेक्सिकोतर्फको किनारामा जुन २४ मा फेला पारेका थिए । छोरी भ्यालेरीको शव भने बाबुको सर्टमा बाँधिएको अवस्थामा भेटिएको थियो ।

ओस्कार र भ्यालेरीको शव आइतबार मेक्सिकोबाट सानसाल्भाडोर ल्याइएको थियो । मार्टिनेज र उनकी पत्नी सानसाल्भाडोरको एक रेस्टुराँमा काम गर्दथे । तर, उनीहरू संयुक्त राज्य अमेरिकामा राम्रो अवसरको खोजीमा गत अप्रिलमा मेक्सिको हुँदै अमेरिकातर्फ प्रस्थान गरेका थिए र रियो ग्रान्डे नदी पार गरेर अमेरिका प्रवेश गर्न चाहन्थे ।

यस्तै दुःखद घटना यसअघि पनि भएका छन् । गत जुन २५ मा पनि रियो ग्रान्डे नदीमै एक व्यक्तिको शव फेला परेको थियो । यस वर्ष थुप्रै व्यक्ति नदीमा डुबिसकेका छन् । अमेरिकी सीमा प्रशासनले सन् २०१८ मा २८० जनाभन्दा बढी व्यक्तिको मृत्यु भएको जनाएको छ । तर, अधिकारकर्मीहरूले मृत्यु हुनेको वास्तविक संख्या अझ बढी रहेको दाबी गरेका छन् ।

अमेरिका–मेक्सिकाबीच करिब तीन हजार किलोमिटर सीमा रहेको छ । मध्यअमेरिकी मुलुकहरू ग्वाटेमाला, एलसाल्भाडोर र होन्डुरसबाट हरेक वर्ष ठूलो संख्यामा अवैध रूपमा अमेरिका प्रवेश गर्नेक्रम वर्षौंदेखि जारी छ ।

अमेरिकी ट्रम्प प्रशासनले अवैध आप्रवासी नियन्त्रणका लागि प्रवेशमा कठोर कदम चाल्ने बताउँदै आएको छ ।

उनीहरूको पानीमा डुबेको तस्बिर अहिले सामाजिक सञ्जालमा भाइरल बनेको छ ।

रासस–सिन्ह्वा