‘साडी आक्रमण’मा परेर कृष्णबहादुर महराले सभामुख पद गुमाएपछि रिक्त पदमा कसको चयन हुन सक्ला भन्ने जिज्ञाशा सर्वत्र पैदा भएको छ । सभामुख पदमा नेकपाभित्रको माओवादीले आफ्नो दाबी प्रस्तुत गर्न सक्ने सम्भावना जति देखिएको छ, नेकपाभित्रकै एमालेले कुनै हालतमा सभामुख पद नछोड्ने सम्भावना पनि त्यति नै देखिएको छ ।

हालसम्म पार्टीभित्र र बाहिर करिब पौने एक दर्जन नेताहरूको नाम सम्भावित सभामुखका रूपमा चर्चामा आएका छन् । सुवास नेम्वाङ, सोमप्रसाद पाण्डे, विरोध खतिवडा, हृदयेश त्रिपाठी, पम्फा भुसाल, देव गुरुङ, देवेन्द्र पौडेल, ओनसरी घर्ती र अग्नि सापकोटाको नाम विभिन्न कुनाबाट विभिन्न स्तरमा चर्चामा रहेको छ । झिनो स्वरमा भए पनि शेरबहादुर देउवा नेतृत्वको काङ्ग्रेस पार्टीले समेत सभामुखमा दाबी गरिरहेको छ ।

सभामुख र उपसभामुख दुई भिन्न दलहरूबाट हुने संवैधानिक व्यवस्था भएकोले राजपाका नेता लक्ष्मणलाल कर्णको नाम पनि सम्भावित उपसभामुखका रूपमा अगाडि आएको छ । सत्तारुढ पार्टीले सभामुख पद नछोड्ने निश्चित भएको र उपसभामुख शिवमाया तुम्बाहाम्फेसमेत नेकपाकै पक्षको भएकोले तुम्बाहाम्फेलाई उपसभामुख पदबाट राजीनामा गराएर मन्त्रिमण्डलमा समावेश गरिने या अन्य कुनै महत्वपूर्ण जिम्मेवारी दिइने सम्भावना छ ।

कास्कीको उपनिर्वाचनमा उम्मेदवार बनाएर विजयी भएमा सोमनाथ अधिकारी ‘प्यासी’ लाई सभामुख बनाइनुपर्छ भन्ने आवाज पनि सुन्नमा आएको छ । उल्लिखित नामहरूमध्ये प्रचण्डले चाहेको पहिलो व्यक्ति अग्नि सापकोटा र केपी ओलीको रोजाइमा सुवास नेम्वाङ परेको बुझिएको छ । गृहमन्त्री रामबहादुर थापा बादल देव गुरुङलाई सभामुख बनाउने पक्षमा देखिएका छन् । माधवकुमार नेपाल ‘ठीक ठाउँमा आए’ सोमप्रसाद पाण्डे (माधव नेपालका सम्धी) लाई सभामुख बनाउन केपी ओली सकारात्मक हुने विश्वास गरिएको छ । प्रचण्डको प्रथम प्राथमिकतामा अग्नि सापकोटा, दोस्रोमा पम्फा भुसाल र तेस्रो प्राथमिकतामा मात्र देव गुरुङ भएको सम्बद्ध सूत्रबाट जानकारी मिलेको छ ।

केपी ओलीको चाहिँ पहिलो प्राथमिकता सुवास नेम्वाङ भए पनि हृदयेश त्रिपाठी र सोमप्रसाद पाण्डेप्रति समेत सकारात्मक भएको बुझिन्छ । ओली र प्रचण्ड दुवैको समान अडान केमा देखिएको छ भने केपी कुनै पनि हालतमा ‘माओवादी’लाई सभामुख दिन तयार हुनुहुन्न र प्रचण्डचाहिँ ‘एमाले’लाई सभामुख पद सुम्पन्न कदापि चाहनुहुन्न । दुई नेताबीच सभामुख चयनको विषयलाई लिएर निकै रस्साकस्सी चल्ने सम्भावना देखिएको छ । प्रमुख नेताहरूबीच उत्पन्न हुने कडा टक्करले उत्पन्न गर्ने परिस्थितिले सुवास नेम्वाङ र अग्नि–पम्फा–देवबाहेकका व्यक्तिलाई ‘सभामुख’ बनाइदिने सम्भावना पनि बलियो छ । यही विषयलाई लिएर केपी र प्रचण्ड आ–आफ्नै बाटो लाग्ने सम्भावना पनि त्यत्तिकै रहेको छ ।

सभामुख चयन तत्काल हुने स्थिति छैन, कास्कीको उपनिर्वाचनपछि मात्र सभामुख चयनको प्रक्रिया शुरु हुने बुझिएको छ ।