नेपाली काङ्ग्रेसका युवा नेता एवम् सांसद डा. अमरेशकुमार सिंहको हत्याका लागि खटिएको बताउने एक व्यक्तिलाई स्थानीय बासिन्दाले पक्राउ गरी प्रहरीको जिम्मा लगाइदिएका छन् । पुस ७ गते अपराह्न सर्लाहीको बलरा नगरपालिकाका बासिन्दाले सन्दिग्ध भारतीय नागरिक विकास झालाई जनताले प्रहरीको जिम्मा लगाएका हुन् ।
पेसेवर सुटरका रूपमा चिनिएका सुशील झाको भान्जा नाता पर्ने विकासले बलराको एउटा भट्टीमा मदिरा सेवन गर्दै गएपछि नसामा आफूले गत वर्ष जुगल साह (कलवार) को घाँटी थिचेर हत्या गरेको र सांसद अमरेश सिंहको हत्या गर्न काठमाडौंसम्म पुगेको बताएका थिए । नसामा यसरी बोल्न थालेपछि त्यहाँ उपस्थितहरूले मोबाइलबाट भिडियो रेकर्ड गरेका थिए ।
सन्दिग्ध विकास झाले भनेका छन्, ‘मैले गत वर्ष जुगल साहलाई सुशील मिश्रको निर्देशनमा मारेको हुँ । म गोली हानेर मार्न चाहन्थेँ, तर सुशीलले गोली नहान्नु घाँटी थिच्नु भनेकोले घाँटी थिचेरै मारेको हुँ ।’ स्मरणीय छ, हत्याको आदेश दिने भनिएका सुशील मिश्र बलरा नगरपालिका– २ को वडाध्यक्ष हुन् र उनी भारतमा ‘मोस्ट वान्टेड’ छन् ।
विकास झाले सांसद अमरेशको हत्या गर्न एकपटक बलरामै प्रयास गरेको र अर्कोपटक काठमाडौं गएर केही दिन होटेलमा बसेको, तर हत्याको निम्ति अनुकूल अवस्था नभएकोले त्यत्तिकै फर्किएको पनि बताएका थिए । यसरी भट्टीमा एक भारतीयले मदिरा सेवन गरी बोलेका कुरा तत्काल फैलियो र केही स्थानीय बासिन्दा खोजी गर्न जाँदा निज विकास झा भारतीय सीमापारि पुगिसकेका थिए । केही व्यक्तिहरू सीमापारि गएर निजलाई फकाउँदै नेपाल ल्याएपछि स्थानीयले बलरा प्रहरी चौकीमा बुझाएको र बलरा थानाले जिल्ला प्रहरी परिसरको जिम्मा लगाएको छ ।
बलरा थानाका प्रमुखसमक्ष पनि विकास झाले आफूबाट भएको अपराधबारे स्पष्ट बयान दिएका थिए । अपराध कबुल गरेपछि मात्र बलरा चौकीले निज सन्दिग्ध व्यक्तिलाई जिल्ला प्रहरी परिसर चलान गरेको हो । तर, यस सम्बन्धमा घटना र विचारले पुस ७ गते राति दश बजे सर्लाहीको जिल्ला प्रहरी प्रमुखसँग टेलिफोन सम्पर्क गर्दा हिरासतमा रहेका विकास झा कुनै अपराधी नभई मादक पदार्थ सेवन गरेर जथाभावी बोल्ने व्यक्ति भएको जानकारी दिइयो । प्रहरी प्रमुख (एसपी) ले यो पात्र र विषयलाई गम्भीरतापूर्वक नलिन पनि आग्रह गरेका छन् । तर, स्थानीय बासिन्दा भने विकास झा अपराधी भएको र निजलाई उन्मुक्ति दिने नियोजित प्रयास माथिल्लो तहबाट भइरहेको ठान्दछन् ।
प्रतिक्रिया