राष्ट्रपति विद्यादेवी भण्डारीले अर्थमन्त्रीमा डा. युवराज खतिवडालाई पुनः नियुक्त गर्नुभएको छ । नेपालको संविधानको धारा ७८ को उपधारा (१) बमोजिम प्रधानमन्त्री केपी शर्मा ओलीको सिफारिसमा राष्ट्रपति भण्डारीले डा. खतिवडालाई नियुक्त गर्नुभएको राष्ट्रपति कार्यालयका प्रवक्ता हरिप्रसाद दाहालले जानकारी दिनुभयो ।

राष्ट्रियसभा सदस्यको पदावधि सकिएपछि मङ्गलबार (२० फागुन) मात्र उहाँले अर्थमन्त्रीको पदबाट राजीनामा दिनुभएको थियो ।

राष्ट्रपति भण्डारीले उहाँलाई सञ्चार तथा सूचना प्रविधि मन्त्रालयको कार्यभारसमेत तोक्नुभएको छ । नवनियुक्त अर्थमन्त्री खतिवडालाई आजै राष्ट्रपति कार्यालय शीतलनिवासमा पद तथा गोपनीयताको शपथग्रहण गराउने कार्यक्रम रहेको राससले जनाएको छ ।