क्यानडाका प्रधानमन्त्री जस्टिन ट्रुडोकी पत्नी सोफीमा कोरोना भाइरसको संक्रमण देखिएपछि अब प्रधानमन्त्री ट्रुडोले पनि १४ दिन आइसोलेसनमा बस्नुपर्ने भएको छ । प्रधानमन्त्री ट्रुडोलाई सेल्फ आइसोलेसनमा राखिएको छ । उनी अब १४ दिनसम्म चिकित्सकको निगरानीमा घरमै रहनेछन् ।

प्रधानमन्त्रीपत्नी सोफीमा बिहीबार कोरोनाको लक्षण पाइएको थियो । परीक्षणपछि आएको रिपोर्टमा कोरोना ‘पोजिटिभ’ देखिएको हो ।

प्रधानमन्त्रीकी पत्नी सोफी दुई दिनअघि मात्र एक कार्यक्रममा सहभागी हुन लन्डन पुगेर फर्किएकी थिइन् । लन्डनबाट फर्किएपछि उनमा ज्वरो आउने, टाउको दुख्नेलगायतका लक्षण देखिएपछि परीक्षण गर्दा उनमा कोरोना पोजेटिभ देखिएको हो ।

शुक्रबार क्यानडाको प्रधानमन्त्री कार्यालयले एक विज्ञप्तिमार्फत यसको पुष्टि गरेको छ । प्रधानमन्त्री कार्यालयद्वारा जारी विज्ञप्तिमा भनिएको छ, ‘प्रधानमन्त्री जस्टिन ट्रुडो ठीक अवस्थामा हुनुहुन्छ । उहाँमा कोरोना भाइरसको कुनै लक्षण देखिएको छैन ।’