कोरोना भाइरसको सङ्क्रमणबाट एक दिनमै दुई हजारभन्दा बढि मानिसको मृत्यु हुने अमेरिका पहिलो देश बन्न पुगेको छ । अमेरिकामा २४ घण्टाभित्र २,१०८ जनाको मृत्यु भएको छ ।

जे.एच. युनिभर्सिटीले जनाएअनुसार पछिल्लो २४ घण्टामा अमेरिकामा मात्रै ‘कोभिड–१९’का कारण उल्लिखित सङ्ख्यामा मानिसको मृत्यु भएको हो ।

बताइएअनुसार यतिबेला अमेरिकामा पाँच लाखभन्दा धेरै व्यक्ति सङ्क्रमित हुन पुगेका छन् । हालसम्म कोरोनाको कारण इटालीमा सबभन्दा धेरै मानिसको ज्यान गएको भए पनि यदि यस्तै अवस्था रहने हो भने अमेरिकाले इटालीलाई छिट्टै उछिन्न सक्ने बताइएको छ ।

तथापि, ह्वाइट हाउसको ‘कोभिड–१९ टास्क फोर्स’ले जनाएअनुसार अमेरिकामा सङ्क्रमणको अवस्था स्थिर हुन पुगेको छ र यसबाट अब मृत्यु हुने सङ्ख्यामा पनि कमी आउने छ ।

ज्ञातव्य छ, अमेरिकामा अहिलेसम्ममा १८,६९३ मानिसको कोरोनाका कारण मृत्यु भइसकेको छ भने ५,००,३९९ व्यक्ति सङ्क्रमित भएका छन् । इटालीमा मृत्यु हुनेको सङ्ख्या १८, ८४९ रहेको छ ।

कोरोनाका कारण विश्वभरमा आजको मिति (११ अप्रिल) सम्ममा मृत्यु हुनेको सङ्ख्या १,०२,०२६ (एक लाख दुई हजार छब्बिस) पुगेको जेएच युनिभर्सिटीले जनाएको छ ।