प्रतिबन्धित नेकपाको नेतृत्वकर्ता नेत्रविक्रम चन्द ‘विप्लव’का भतिजा दिलीप चन्दलाई नवलपरासी (बर्दघाट सुस्ता पश्चिम) प्रहरीले नियन्त्रणमा लिएको छ ।
सर्वोच्च अदालतको आदेशमा जिल्ला अदालतबाट थुनामुक्त दिलीपलाई प्रहरीले बिहीबार (११ वैशाख) पुनः नियन्त्रणमा लिएको हो ।
बन्दीप्रत्यक्षीकरण निवेदनका आधारमा सर्वोच्च अदालतले उनलाई थुनामुक्त गर्न जिल्ला अदालतलाई आदेश दिएको थियो । सर्वोच्च अदालतको आदेशको कार्यान्वयन गर्दै नवलपरासी जिल्ला न्यायाधीश अशोककुमार बस्नेत, नेपाल पत्रकार महासंघ जिल्ला शाखा र नेपाल बार एशोसियशनका प्रतिनिधिको रोहबरमा दिलीपलाई थुनामुक्त गरेलगत्तै जिल्ला प्रहरी कार्यालयबाट आएका प्रहरीले परासीको बुद्धचोकबाट दिलिपलाई पक्राउ गरेका हुन् ।
पक्राउ परेका दिलिप विप्लवका दाइ चन्द्रबहादुर चन्दका छोरा हुन् । चन्द्रबहादुरलाई पार्टीमा वीरजंग उपनामले चिनिन्छ ।
गत फागुन १९ गते कपिलवस्तुबाट अभद्र व्यवहारको आरोपमा पक्राउ परेका उनलाई चैत २३ गते जिल्ला प्रशासन कार्यालय कपिलवस्तुले तारेखमा छाडेको थियो । सोही दिन उनलाई कपिलवस्तुबाट प्रहरीले पक्राउ गरी नवलपरासी (बर्दघाट सुस्ता पश्चिम) जिल्ला प्रहरी कार्यालयमा पठाएको थियो ।
कपिलवस्तुको शिवराज नगरपालिका–९ घर भएका ३२ वर्षीय दिलीपका बाबु वीरजंग पनि केही महिनादेखि जेलमै छन् । हाल उनी तुलसीपुरमा बन्दी तुल्याइएका छन् ।
प्रतिक्रिया