कोरोना भाइरसको संक्रमणबाट जोगाउने अन्धविश्वासमा परेर विषाक्त मादक पदार्थ सेवन गर्दा इरानमा मृत्यु हुनेको सङ्ख्या सात सय नाघेको छ । रक्सी सेवन गर्दा कोरोनाले छुन नसक्ने भन्ने भ्रममा परेर अत्यधिक रक्सी सेवन गरेकाको मृत्यु भएको इरानी अधिकारीहरुले जनाएका छन् ।

त्यहाँका सरकारी अधिकारीले दिएको जानकारीअनुसार विषाक्त रक्सी सेवनका कारण कुल ७ सय २८ जनाको मृत्यु भएको छ । गत फेब्रुअरी २० देखि अप्रिल ७ सम्ममा उनीहरुले अत्यधिक रक्सी सेवन गरेका थिए ।

इरानमा गत पनि वर्ष विषाक्त रक्सी सेवनका कारण ६६ जनाको मृत्यु भएको थियो । देशमा कोरोना भाइरसको सङ्क्रमण फैलिन थालेपछि उनीहरुले अत्यधिक मात्रामा रक्सी सेवन गरेका थिए ।

इरान कोरोना भाइरसको सङ्क्रमण फैलिएको हिसाबले मध्यपूर्वकै सबैभन्दा बढी प्रभावित देशमा पर्दछ ।

इरानका स्वास्थ्य मन्त्रायका प्रवक्ता किनौश जाहनपौरले पाँच हजारभन्दा धेरै व्यक्तिको विषाक्त रक्सीका कारण आँखा खराब भएको थियो र पनि यस्तो रक्सी सेवनमा पूर्णबिराम लागेन । इरानका अधिकांश भागमा रक्सी प्रतिबन्ध रहेको छ तर रक्सी सेवनका कारण कोरोनाबाट बच्न सकिन्छ भन्ने गलत हल्ला फैलिएपछि कैयौँ व्यक्तिले त्यही हल्लाका पछि लागेर कडा प्रकारका रक्सी सेवन गरेका एएनआईले जनाएको छ ।

विषाक्त रक्सीले सुरुमा मस्तिष्कलाई असर गरेर शरिरका अन्य अङ्गलाई पनि काम गर्न नसक्ने बनाउने गरेको विज्ञहरु बताउँछन् । विषाक्त मदिराका सेवनकर्ताहरुलाई छाती दुख्ने, वान्ता हुने, आँखामा समस्या हुनेलगायतका लक्षण देखिने गरेको थियो ।

ज्ञातव्य छ, इरानमा अहिलेसम्म कोरोना भाइरसका कारण मृत्यु हुनेको सङ्ख्या पाँच हजार ८०६ पुगेको छ भने, ९१ हजारभन्दा बढी सङ्क्रमित भएका छन् । यो सङ्ख्या मध्यपूर्व कै सवैभन्दा धेरै भएको जनाइएको छ ।