कोरोनाभाइरसका कारण जारी गरिएको लकडाउन तत्काल हटाउन माग गर्दै अमेरिकी मिसिगन राज्यको मुख्य सरकारी कार्यालय भवनमा बन्दुक बोकेका केही प्रदर्शनकारीहरू प्रवेश गरी डेमोक्र्याटिक गभर्नरलाई धम्क्याएका छन् ।

ल्यानसिङको सरकारी भवनको लबीमा प्रवेश गरेका दर्जनौँ प्रदर्शनकारी हाउस चेम्बर भित्र प्रवेश गर्न पाउनुपर्ने भन्दै नारा जुलुस गरेका थिए । त्यहाँ उपस्थित कतिपय सांसदले बुलेटप्रुफ भेष्ट लगाएका थिए ।

मास्कलगायका राज्य प्रहरीले उनीहरुलाई भित्र प्रवेश गर्न रोकेका थिए भने प्रदर्शनमा भाग लिएका कुनै पनि प्रदर्शनकारीले मास्क लगाएका थिएनन् ।

“राइफल बोकेका मान्छेहरू मेरै छेउमा आइपुगे,’ सिनेटर डायना पोलेहान्कीले ट्वीटमा भन्नुभएको छ । ट्वीटमा उहाँले सार्वजनिक गर्नुभएको तस्वीरमा चार जना पुरुष देखाइएको छ जसमध्ये कम्तीमा एक जनासँग हतियार रहेको छ । बुलेटप्रुफ भेस्ट भएका मेरा केही सहकर्मीहरूले त्यो रक्षाकवच लगाएका छन् ।’

प्लेकार्ड सहित संसद भवन बाहिर भेला भएका धेरै प्रदर्शनकारीले गभर्नर ग्रेचेन ह्विटरको तुलना एडोल्फ हिटलरसँग गरेका थिए ।

अमेरिकी प्याट्रियट जुलुस भनिएको उक्त प्रदर्शनलाई मिसिगन युनाइटेड लिबर्टी भन्ने समूहले आयोजना गरेको थियो । यो समूहमा ८ हजार ८०० भन्दा बढी व्यक्ति सदस्य रहेका छन् ।

यसै महिना लकडाउन हटाउन गरिएको यो दोस्रो प्रदर्शन हो । जोन्स हप्किन्स विश्वविद्यालयका अनुसार कोरोनाभाइरसका कारण मिसिगन राज्यमा मात्र तीन हजार ५०० भन्दा बढी व्यक्तिको मृत्यु भएको छ ।

गत अप्रिल १६ मा पनि करिब तीन हजार व्यक्तिले ल्यानसिंगमा प्रदर्शन गरेका थिए । प्रदर्शनका कारण राजधानीमा केही समय ट्राफिक जाम भएको थियो ।

एक दिन पछि राष्ट्रपति डोनाल्ड ट्रम्पले प्रदर्शनकारीको समर्थन गर्दै “लिबरेट मिसिगन । अर्थात् मिसिगनलाई मुक्त गरौं” भन्दै ट्वीट गरेका थिए ।

गभर्नर ह्विटमरले सिएनएनलाई प्रदर्शनकारी ‘रिसाउनु ठीक छ’ भन्दै प्रतिक्रिया दिएका थिए ।