नेपालका कराते खेलाडी तथा प्रशिक्षक रवीन्द्र मानन्धर ‘सद्गुरु मास्टर्स अनलाइन कराते काता च्याम्पियनसिप २०२०’ को फाइनलमा प्रवेश गरेका छन् ।
केरला कराते संघ, भारतको आयोजनामा भएको अनलाइन कराते काता च्याम्पियनसिपमा आफ्ना २१ प्रतिद्वन्द्वीलाई पछाडि पार्दै मानन्धर ३५ देखि ४५ वर्ष उमेर समूह ‘ए’बाट फाइनल प्रवेश गरेका हुन् ।
उनले सेमिफाइनलमा भारतका खेलाडीहरुलाई पछि पार्दै फाइनल यात्रा तय गरेका हुन् । अब उनले उपाधिका लागि फाइनलमा स्पेनका खेलाडीको सामना गर्नेछन् ।
विश्व कराते महासंघ र एसियाली कराते महासंघको नियममा खेलाइएको अनलाइन च्याम्पियनसिपमा ३५ – ४५, ४५ – ५५, ५५ – ६५ र कुबुदो गरी ४ विधामा प्रतिस्पर्धा गराइएको मानन्धर जानकारी दिए । नेपालबाट सो च्याम्पियनसिपमा प्रतिस्पर्धा गर्ने मानन्धर एक्ला खेलाडी हुन् ।
विगत एक महिनादेखि संचालन भइरहेको च्याम्पियनसिपमा जापान, भारत, स्पेन, श्रीलङ्का, नेपाल, फिलिपिन्स, भियतनाम, भनेजुयला लगायतका राष्ट्रले सहभागिता जनाएका छन् । अन्य विधाको सेमिफाइनल सम्पन्नपश्चात फाइनल जुन १३ तारिखमा आयोजना हुने मानन्धरले जानकारी गराए ।
कोभिड–१९ बाट विश्व अक्रान्त भइरहेको अवस्थामा विश्वका बिभिन्न अन्तर्राष्ट्रिय खेल संस्थाहरुले अनलाइनमार्फत खेलाडी तथा प्रशिक्षकहरुलाई क्रियासील गर्दै आइरहेका छन् । त्यसै क्रममा विश्व कराते महासंघ र एशियाली कराते महासंघको सम्बन्धनमा केरला कराते संघले उक्त च्याम्पियनसीप आयोजना गरेको हो ।
प्रतिक्रिया