राष्ट्रिय खेलकुद परिषदको भावी सदस्यसचिवको लागि स्पोर्टस् साइन्समा विद्यावारिधि (पिएचडी) गरेका अच्युतम् लामिछानेले युवा तथा खेलकुद मन्त्रालयमा सदस्यसचिव पदका लागि निवेदन दर्ता गराएका छन् । अहिलेसम्म सदस्यसचिवका लागि दुई महिलासहित ११ जनाको निवेदन परे पनि विद्यावारिधि गरेको व्यक्ति भने लामिछाने मात्रैै छन् । लामिछाने स्पोर्टस् साइन्समा विद्यावारिधि गर्ने पहिलो नेपाली हुन् ।
४३ वर्षीय लामिछानेले दक्षिण कोरियाको योङ इन विश्वविद्यालयवाट स्नातक, स्नाकोत्तर र विद्यावारिधि गरेका छन् । साथै लामिछानेले सन् २०१२ देखि २०१६ सम्म राष्ट्रिय खेलकुद परिषदअन्तर्गत स्पोर्टस् साइन्स एकेडेमी (शान) सातदोबाटोमा खेल विज्ञको रूपमा चार वर्ष कार्य गरिसकेका छन् । लामिछाने तेक्वान्दोका ब्ल्याकबेल्टसहित चार डान पनि हुन् ।
स्पोर्टस् साइन्स एकेडेमी (शान) मा आवद्ध रहँदा खेलकुदको आधारभूत विकास नभएको र खेलकुदको नीति–सिद्धान्तभित्र रहेर खेलकुदको गतिविधि सञ्चालन नभएको लामिछानेको दाबी छ । प्रायःजसो राजनीतिक दबाबमा रहेर निर्णय गरिने हुँदा त्यसमा सुधार गर्न आफूले सदस्यसचिवको उम्मेदवारमा निवेदन दिएको बताए ।
लामिछानेले सदस्यसचिवको लागि उम्मेदवारी दिँदा समग्र खेलकुदको विकास ‘राष्ट्रिय खेलकुद विकास परियोजना’को खाका बनाएर कार्यपत्र निवेदनका साथ पेस गरेका छन् । रिसर्च गरेर दिन नपाए पनि नेपाल सुहाउँदो वैज्ञानिक ढङ्गले तयार पारेर आफुले कार्यपत्र दिएको लामिछाने बताए । लामिछाने ‘राष्ट्रिय खेलकुद विकास परियोजना’ सम्बन्धी ६५ पेज लामो कार्यपत्र पेस गरेका छन् ।
आफुले निवेदनसहित कार्यपत्र मन्त्रालयमा बुझाउँदा समितिका पदाधिकारीले यो लेवलको उम्मेदवारी र कार्यपत्र आउँछ भन्ने विश्वास नलागेको भन्दै सकारात्मक धारणा राखेको लामिछानेले बताए । साथै तपाईंजस्तो व्यक्तिको खेलकुदमा खाँचो र चाहिन्छ पनि भनेको लामिछाने सुनाए ।
म सदस्यसचिवको लागि योग्य व्यक्ति हुँ, तर म सदस्यसचिव नहुँदा पनि खासै फरक पर्दैन । म खेलकुदलाई माया गर्ने व्यक्ति भएकोले यदि म सदस्यसचिवमा चयन नहुँदा पनि राज्यलाई खेलकुदको विकासको लागि काम लागोस भनेर ६५ पेज लामो कार्यपत्र पेश गरेको लामिछानेले प्रस्ट पारे ।
सदस्यसचिवको उम्मेदवारीको लागि निवेदन दिने अन्तिम मिति साउन १ गते बिहीबार (आज) सम्म रहेको छ । अहिलेसम्म निवर्तमान सदस्यसचिव रमेशकुमार सिलवालसहित ११ जनाले सदस्यसचिवको लागि उम्मेदवारी दर्ता गराइसकेका छन् ।
प्रतिक्रिया