चितवन मेडिकल कलेजमा उपचाररत थप एक महिलाको कोरोना सङ्क्रमणका कारण मृत्यु भएको छ । मृत्यु हुनेमा भरतपुर महानगरपालिका वडा नम्बर ११ की ४० वर्षीया महिला रहेकी छन् ।

अस्पतालका अध्यक्ष एवम् प्रबन्धनिर्देशक प्राडा हरिशचन्द्र न्यौपानेका अनुसार यही भदौ ५ गते स्वासप्रस्वासमा समस्या भए पछि उनलाई अस्पतलामा भर्ना गरिएको थियो । भदौ १० गते कोरोना सङ्क्रमण देखिएको उनको बुधबार राति १२ः४० बजे मृत्यु भएको हो ।

योसँगै चितवनमा मृत्यु हुनेको सङ्ख्या १८ पुगेको छ । चितवनका १० जना, मकवानपुरका ४ जना, वारा, गोर्खा, कैलाली र नवलपसारी (सुस्तापूर्व)का १–१ जनाको कोरोना सङ्क्रमणका कारण उपचारका क्रममा चितवनमा मृत्यु भएको हो ।

चितवनमा भएको पछिल्लो मृत्युसँगै नेपालभर कोरोनाका कारण मृत्यु भएकाहरुको कुल संख्या २५२ पुगेको छ ।

कोरोना भाइरसको कारणले बुधबार (१७ भदौ) एकै दिन १२ जनाको निधन भएको थियो । स्वास्थ्य तथा जनसङ्ख्या मन्त्रालयले मंगल र बुधबारको २४ घण्टा अवधिमा ६ महिला र ६ पुरुषको सङ्क्रमणको कारणले निधन भएको बुधबार जानकारी गराएको थियो ।

बताइएअनुसार मङ्गलबार र बुधबार बिहानसम्ममा ११ जना सङ्क्रमणबाट निधन भएका थिए । सङ्क्रमणबाट निधन हुनेमा चितवनका ५५ रु १८, काठमाडाँंका ८९, ललितपुरका ७०, तनँहुका २० र कपिलवस्तुका ६० वर्षीया महिला रहेका छन् । यस्तै बाराका ९७, चितवनका ६५, भक्तपुरका ४०, काठमाडौँका ७० र ७५ र धादिङका ४७ वर्षीय पुरुष रहेका छन् । नेपालमा कोभिड–१९ को कारणले मृत्यु हुने सङ्क्रमितमध्ये ०.६ प्रतिशत हो ।