विशेष प्रतिनिधि, कपिलवस्तु

कपिलवस्तुको बाणगंगा नगरपालिकाको कोइली खोलामा आएको बाढीले विद्युत प्राधिकरणको जिप बगाउँदा दुई जनाको मृत्यु भएको छ ।

बुधबार (७ असोज) दिउँसो ४ बजे बाणगंगा नगरपालिकाको वडा नं ९ भलवाडमा बिद्युतसम्बन्धी समस्या समाधान गरेर फर्किने क्रममा बा १ ञ १०८९ नम्बरको जिप बगाएको थियो । मोतिपुर कजवे पार गर्ने क्रममा बगाएको जिल्ला ट्राफिक प्रहरी कार्यालय कपिलवस्तुले जानकारी दिएको छ ।

मृत्यु हुनेमा गुल्मी जिल्ला रेशुंगा नगरपालिका उपल्लो तम्घासका विद्युत प्राधिकरणका सवारी चालक माधव पाण्डे रहेका छन् । एक जनाको शव गाडीभित्र रहेको र निकाल्ने प्रयास भइरहेको बताइएको छ । जिपभित्र बिद्युत प्राधिकरण जितपुर फ्युज सेवाका प्रमुख कृष्ण पौडेल र नाम नखुलेका एक जना व्यक्तिसमेत थिए ।

जिपमा चार जना विद्युतका कर्मचारी र दुई जना सर्वसाधरण चढेका थिए । दुई कर्मचारी र एक सर्वसाधरण भाग्न सफल भएका बाणगंगा नगरपालिका वडा नं. ८ का अध्यक्ष विष्णु गिरीले बताए ।

खोजतलासका लागि घटनास्थलमा सशस्त्र प्रहरी, नेपाली सेना र नेपाल प्रहरी परिचालन गरिएको सशस्त्र प्रहरी २८ नं. गणका प्रमुख सशस्त्र प्रहरी उपरीक्षक ध्रुव कार्कीले बताए । खोलामा पानीको बहाव चर्को भएकोले खोजतलास गर्न असहज भएको बताइएको छ ।