उपराष्ट्रपतिमा दक्षिण एसियाली मूलकी कमला ह्यारिस

पूर्वराष्ट्रपति बाराक ओबामाको दुवै कार्यकालमा उपराष्ट्रपतिको जिम्मेवारी निर्वाह गरेका ७७ वर्षीय जो बाइडेन अमेरिकाको ४६औँ राष्ट्रपति निर्वाचित भएका छन् । रिपब्लिकन पार्टीका उम्मेदवार वर्तमान राष्ट्रपति डोनाल्ड ट्रम्पलाई पराजित तुल्याउँदै बाइडेन राष्ट्रपति चुनिएका हुन् ।

अमेरिकाको इतिहासमै सन् १९०० यता सर्वाधिक लोकप्रिय मत सङ्ख्या हासिल गर्दै बाइडन राष्ट्रपति निर्वाचित भएका छन् । संसदमा २७० इलेक्टोरल कलेज भोट आवश्यक पर्नेमा उनले २८४ भोट हासिल गरेका छन् । ट्रम्पलाई भने २१४ मत मात्र प्राप्त भएको छ । दोस्रो कार्यकालको लागि पराजित हुने एघारौँ राष्ट्रपतिको रूपमा ट्रम्पको नाम दर्ज भएको छ ।

बाइडेनसँगै दक्षिण एसियाली मूलकी कमला ह्यारिस उपराष्ट्रपति निर्वाचित भएकी छन् ।

बाइडेन र ह्यारिसले निर्वाचन जिते पनि आधिकारिक घोषणा हुन भने बाँकी नै छ ।

निर्वाचन जितेपछि बाइडेनले आफ्नो ट्वीटरमा लेखेका छन्– ‘अमेरिका ! तिमीले मलाई यस महान् देशको नेतृत्वका लागि चुनेका छौ, मेरो लागि यो सम्मानको कुरा हो ।’

उनले अगाडि लेखेका छन्– ‘हाम्रा लागि अगाडिका काम चुनौतीपूर्ण छन्, तर म अमेरिकी जनतासँग बाचा गरिरहेको छु कि मलाई मत दिनुभएको होस् या नदिनुभएको, म हरेक अमेरिकीको राष्ट्रपति हुनेछु । तपाईंहरूले ममाथि जुन भरोसा गर्नुभएको छ, यसमा म खरो उत्रिने छु ।’