कोरोना संक्रमणबाट मृत्यु हुनेको संख्या १,६६३ पुग्यो

नेपालमा बिहीबार थप १,२१७ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । मन्त्रालयका अनुसार नेपालमा कोरोना संक्रमितको संख्या अब २,४५,६५० पुगेको छ ।

पछिल्लो २४ घण्टामा काठमाडौं उपत्यकामा थप ४०४ जना कोरोना संक्रमित थपिएका छन् ।काठमाडौंमा ३२८, भक्तपुरमा २५ र ललितपुरमा ५१ जना कोरोना संक्रमित थपिएका हुन् । संक्रमित हुनेमा २४४ पुरुष र १६० महिला रहेको मन्त्रालयले जानकारी दिएको छ।

पछिल्लो २४ घण्टामा जम्मा ७,२३२ पीसीआर परीक्षण भएका छन् भने कोरोनामुक्त भएर १,०६४ जना डिस्चार्ज भएका छन् । नेपालमा हालसम्म कोरोनामुक्त हुनेको संख्या २,३१,६० जना पुगेको छ ।

त्यस्तै, पछिल्लो २४ घन्टामा नेपालमा थप १२ जनाको कोरोना संक्रमणबाट मृत्यु भएको स्वास्थ्य तथा जनसंख्या मन्त्रालयले जनाएको छ । योसँगै नेपालमा कोरोना संक्रमणबाट मृत्यु हुनेको संख्या १,६६३ पुगेको छ ।