दोलखा जिल्लाको एकै परिवारका तीन दिदीबहिनीले विश्वको सगरमाथाको आरोहण गर्न सफल भएकामा सञ्चार तथा सूचना प्रविधिमन्त्री पार्वत गुरुङले बधाई ज्ञापन गरेका छन् । दोलखा, गौरीशंकर गाउँपालिका–९ बेदिङका निमाजाङ्बु (३०वर्ष), छिरिङनाम्गे (२६वर्ष) र दावाफुटी शेर्पा (२४वर्ष) आज बिहान सर्वोच्च शिखरमा पुग्न सफल भएका हुन् ।
“एकै परिवारका तीन छोरी सगरमाथाको चुचुरामा पुग्न सफल भएका छन्, मलाई असाध्यै खुशी लागेको छ, म हार्दिक बधाई तथा शुभकामना दिन चाहन्छु, तीन वर्षभित्र सात वटै महादेशका हिमाल चढेर विश्व रेकर्ड कायम राख्ने उहाँहरुको योजना पूरा होस्”, मन्त्री गुरुङको कामना हो यो ।
सगरमाथा आरोहणका लागि काठमाडौंंबाट जाने क्रममा यही वैशाख २ गते राष्ट्रिय झण्डा हस्तान्तरण गर्दै सरकारका प्रवक्ता गुरुङले गृहजिल्लाका तीन दिदीबहिनीलाई शुभकामना दिएका थिए ।
आजै सोही गाउँका पेम्बादोर्जे शेर्पाले पनि बिहान ७ बजे २१औंँ पटक सगरमाथाको सफल आरोहण गरेका राससले जनाएको छ । ड्रिमर्स डेष्टिनेशन ट्रेक एण्ड एक्सपिडिशनलाई उद्धृत गर्दै जनाइएअनुसार पेम्बाले ‘विश्व शान्ति र वातावरण बचाऔँँ’ भन्ने सन्देशका साथ सगरमाथा चढेका हुन् ।
pict:rss
प्रतिक्रिया