कोभिड १९ को दोश्रो लहरका कारण उपत्यका निषेधाज्ञा जारी भएपश्चात कठिनाइमा परेका असहायहरुलाई पूर्व राष्ट्रिय खेलाडी एवं अखिल नेपाल टेबल टेनिस क्लबका उपाध्यक्ष राजेन्द्र दुलाल र पत्नी समीक्षा दुलालको सहयोग जारी रहेको छ ।

सोही क्रममा दुलाल दम्पतीले अमेरिकाको क्यालिफोर्नियामा रहेका मित्र महेन्द्रराज पाण्डेको सहयोगमा अनाथ बालबालिकाहरुलाई खाद्यान्न सहयोग गरेका छन् । दुलाल दम्पतीले लगनखेलस्थित सम्बन्ध आश्रममा रहेका २० जना अनाथ बालबालिकाको परिवार र बुढानिलकण्ठस्थित सृजना सामाजिक सेवा समाजका २५ अनाथ बालबालिकाहलाई दुई-दुई बोरा चामल, चाउचाउ एक-एक कार्टुन, दुई-दुई लिटर खानेतेल, चार-चार प्याकेट नुन, दुई-दुई कार्टुन बिस्कुट र एक-एक केजी सोयाविन मस्यौरा र पिउने पानीका बोतलहरू प्रदान गरेका छन् ।

दुलाल दम्पतीले विगतदेखि नै असहायहरुलाई सहयोग गर्दै आइरहेका छन् । ‘यस असहज परिस्थितिमा असहाय र कठिन अवस्थामा रहेकाहरुलाई सानो सहयोग गर्न अग्रसर भएका हौंँ । जानकारी प्राप्त गरेको खण्डमा अन्य असहायहरु, खेलाडी, खेलकर्मी र खेलपत्रकार साथीहरूलाई पनि सहयोग गर्न तयार छौँ’- ठमेल पर्यटन विकास परिषदका सदस्य समेत रहेका राजेन्द्र दुलालले बताए ।