लियोनेल मेसीले आफ्नो फुटबलको शानदार करियरमा बार्सिलोनाको तर्फबाट थुप्रै पटक उपाधि जिते पनि अर्जेन्टिनाको तर्फबाट अहिलेसम्म कुनै पनि ठूलो उपाधि जित्न सकेका छैनन् । विश्वकप फुटबल र कोपा अमेरिका कप जितेर उनले आफ्नो सपना पूरा गर्न चाहेका छन्, जो अहिलेसम्म अधुरै रहेको छ ।

३३ वर्षीय मेसी अहिले कोपा अमेरिका कप खेल्दैछन् । कोपा अमेरिकामा सम्भवतः उनको आखिरी सहभागिता हुन सक्छ । त्यसैले उनी कोपा अमेरिका कप जितेर आफ्नो अधुरो सपना पूरा गर्ने धूनमा छन् ।

कोपा अमेरिका खेल्न ब्राजिल पुगेका मेसीले प्रेस सम्मेलनमा भने– ‘मेरो सबैभन्दा ठूलो सपना राष्ट्रिय टीमलाई उपाधि जिताउनु हो । यसको लागि म जहिले पनि आफ्नो टीमको लागि उपलब्ध हुनेछु ।’

‘म थुप्रै पटक उपाधिको नजिक पुगेँ तर दुर्भाग्य ! आफ्नो देशलाई उपाधि जिताउन सकिनँ । तर, मेरो प्रयास जारी छ । यसपटक म मेरो सपना पूरा गर्न कुनै कसर राख्ने छैन ।’