इन्डियन प्रीमियर लिग (आईपीएल)को चौधौं संस्करणका बाँकी खेल १९ सेप्टेम्बरदेखि शुभारम्भ हुने भारतीय क्रिकेट कन्ट्रोल बोर्ड (बीसीसीआई) ले जानकारी गराएको छ । केही समयअघि बीसीसीआईले आईपीएलका बाँकी खेलहरू संयुक्त अरब इमिरेटमा (युएई)मा खेलाउने जानकारी गराए पनि मिति भने घोषणा गरेको थिएन ।

भारतमा कोरोनाको महामारी ब्यापक रूपमा फैलिएपछि आईपीएलको चौधौं संस्करण बीचैमा स्थगित भएको थियो । यसपछि बाँकी खेल कहिले र कहाँ आयोजना गरिने बारेमा कुनै जानकारी गराइएको थिएन । अब आईपीएलको चौधौँ संस्करणका बाँकी खेलहरू १९ सेप्टम्बरदेखि शुरु हुनेछन् भने फाइनल खेल १५ अक्टुबरमा हुनेछ ।

भारतीय क्रिकेट कन्ट्रोल बोर्ड र इमिरेट क्रिकेट बोर्डबीच हालै बसेको बैठकले आईपीएलका बाँकी खेलहरू युएईका प्रमुख शहरहरू दुबई, शारजाह र आबुधावीमा आयोजना गर्ने सहमति भएको हो । आईपीएलको चौधौँ संस्करण कोरना महामारीका कारण स्थगित भएपछि बाँकी खेल आयोजनाको लागि विभिन्न राष्ट्रहरूले दाबेदारी प्रस्तुत गरेका थिए । त्यसमध्ये युएई पनि एक थियो ।

आईपीएलको १३औँ संस्करणको आयोजना युएईमा नै भएको थियो । उक्त संस्करण युएईका दुबई, शारजाह र आबुधावीमा शहरमा सफलतापूर्वक सम्पन्न भएको थियो । यही कुरालाई मध्यनजर गर्दै युएईले बाँकी खेलको आयोजनाको लागि दाबी गरेको थियो । युएईले बीसीसीआईको बोर्ड बैठक बसेर निर्णय गर्नुअघि नै मौखिक रूपमा मन्जुरीसमेत दिएको थियो ।

आईपीएलको बाँकी खेलहरू युएईमा आयोजना हुने टुङ्गो लागेसँगै उक्त प्रतियोगितामा विदेशी खेलाडीको उपस्थितिको बारेमा प्रश्न उठेको छ । यो विषयमा बीसीसीआईले सम्पूर्ण विदेशी खेलाडीहरूसँग कुराकानी भइरहेको र परिणाम सकारात्मक आउने कुरामा आफू विश्वस्त रहेका बताएको छ । केही खेलाडीबाहेक प्राय सबै विदेशी खेलाडीले आईपीएलमा सहभागिता जनाउने बीसीसीआईका एक अधिकारीको दाबी गरेका छन् ।

कोरोना भाइरसका कारण आईपीएलको १४औँ संस्करण ४ मेदेखि स्थगित भएको थियो । २ मे सम्म २९ खेल भएका थिए । यो अवधिसम्म दिल्ली क्यापिटल्सले ८ खेलमा ६ जितका साथ शीर्ष स्थानमा रहेको थियो । त्यस्तै चेन्नई सुपर किङ्ग र आरबीसीले पाँच पाँच खेल जित्दै दोश्रो र तेस्रो स्थानमा थिए । अब आईपीएलका बाँकी खेलहरू २५ दिनमा सम्पन्न हुनेछन् ।