संयुक्त राष्टसङ्घका महासचिव एन्टोनियो गुटर्रेसले अफगानिस्तानको तालिबान समूहलाई अफगानिस्तानका सरकारी कार्यालय कब्जा गर्ने कार्यलाई तत्कालै बन्द गर्न आग्रह गरेका छन् ।

आफ्ना सशस्त्र विद्रोही लडाकूलाई आदेश दिई हाल अफगानिस्तानमा जारी रहेको सशस्त्र विद्रोहको काम फिर्ता गर्न लगाउन उनले तालिबान लडाकू समूहसँग आग्रह गरेका हुन् ।

हालका लागि यो कार्यलाई रोकेर शान्तिपूर्ण रुपमा आफ्ना काम गर्न र आफ्ना कुरा राख्न उनको आग्रह रहेको सिन्ह्वाले जनाएको छ ।

उनले अफगानिस्तानको तालिबान समूहलाई शान्तिपूर्ण रुपमा आफ्ना माग राख्न सुझाव दिँदै वार्ताको टेबलमा बस्न भनेका छन् ।

हाल तालिबानले अफगानिस्तानमा एकपछि अर्को कार्यालय कब्जा गरिरहेका छन् भने अमेरिकाको नेतृत्वमा रहेको नेटो सैनिक र अमेरिकी सैनिक अफगानिस्तानबाट यतिबेला फर्किसकेको छ ।

विदेशी सैनिक फर्किएलगतै तालिबान लडाकूले अफगानिस्तान कब्जा गर्ने गरी कार्यक्रम अघि सारेका छन् र उनीहरु एकपछि अर्को गरेर अघि बढ्दैछन् ।

जसका कारण अफगानिस्तानमा हिंसा भइरहेको छ । तालिबानले शहर कब्जा गर्न सशस्त्र विद्रोह गरिरहेका छन् भने अफगानिस्ताको सेनाले तालिबानका विरुद्ध कारबाही पनि जारी राखेको छ । जसका कारण पछिल्ला दुई हप्तायता मात्र अफगानिस्तानबाट दुई लाखभन्दा बढी व्यक्ति घरबास छोडेर भागेका छन् भने कैयौँ सर्वसाधारण नागरिक सरकारी सेना र तालिबानी लडाकूको भिडन्तमा परेर मारिएका पनि छन् ।

महासचिव गुटर्रेसले बलपूर्वक गरिएका कुनै पनि कार्यको सट्टामा शान्तिपूर्ण रुपमा वार्ताको टेबलमा बसेर सबै कुरा गर्न तालिबान लडाकूको समूहलगायत सरोकारवाला सबैलाई आग्रह गरेका हुन् ।