सन् १९५१ मा भारतको नयाँ दिल्लीमा आयोजना भएको प्रथम एसियाली खेलकुद प्रतियोगितामा सहभागिता जनाएका नेपालका प्रथम अन्तर्राष्ट्रिय धावक तथा नेपाली सेनाका पहिलो पुस्ताका खेलाडी स्व. गजराज जोशीको शालिक अनावरण गरिएको छ ।
नेपाल ओलम्पिक संग्रालयको आयोजनामा नेपाल ओलम्पिक कमिटिको प्रेक्षालयमा आयोजित कार्यक्रममा नेपाल ओलम्पिक कमिटीका अध्यक्ष जीवनराम श्रेष्ठले नेपाली खेलकुदका प्रथम अन्तर्राष्ट्रिय धावक गजराज जोशीको अर्धकदको शालिक अनावरण गरेका हुन् । ढलोटबाट बनेको मूर्ति ओलम्पिक कमिटीको सातदोबाटोस्थित मुख्यालयमा रहेको छ ।
कार्यक्रममा एनओसीका महासचिव निलेन्द्रराज श्रेष्ठ र टोखा नगरपालिकाका मेयर प्रकाश अधिकारीले नेपाली खेलकुदमा जोशीको योगदानबारे अभिव्यक्ति दिएका थिए । कार्यक्रममा कमिटीका उपाध्यक्ष तथा कार्यकारी निर्देशक चतुरानन्तराज वैद्यलगायत अन्य प्रमुख पदाधिकारीको उपस्थित थियो ।
मूर्ति ओलम्पिक भवनको भुइाँतल्लामा नेपाल ओलम्पिक संग्रहालयअगाडि रहनेछ ।
सो अवसरमा प्रमुख अतिथि श्रेष्ठले जोशीलाई आफुले एक खेलाडीको रुपमा मात्र स्मरण गरेकोमा आज आएर उनका बारेमा विविध जानकारी हासिल गर्न पाएको बताए । श्रेष्ठले आउँदो पिँढीको लागि जोशीको योगदानबाट प्रेरणा मिल्ने धारणा राखे ।
जोशी नेपाली खेलकुदको इतिहासमा अन्तर्राष्ट्रिय सहभागिता जनाउने क्रममा पहिलो पुस्ताका खेलाडीमा पर्छन् । नेपाली खेलकुदमा उनले पुऱ्याएको अतुलनीय योगदानका लागि नेपाल खेलकुद पत्रकार मञ्चले ‘लाइफ टाइम एचिभमेन्ट अवार्ड’ समेत सम्मान गरेको थियो ।
सैनिक जवाका रूपमा नेपालको प्रतिनिधित्व गरेका जोशी दक्षिण एसियाली खेलकुदमा सहभागी टिमका एक सदस्यमा थिए । दौड स्पर्धामा सहभागिता जनाएका उनले एथलेटिक्ससंगै महावीर र एनआटीबाट फुटबल पनि खेलेका थिए ।
गजराजको जन्म वि.सं १९७९ सालमा गाईजात्राका दिनमा टोखामा भएको थियो । जोशी युवा अवस्थामा इन्डियन ब्रिटिस आर्मीमा भर्ती भएर दोस्रो विश्वयुद्धमा बर्मामा सहभागि समेत भएका थिए । दोस्रो विश्वयुद्धको समाप्तिसंगै नेपाल फर्केका जोशीले त्यसपछि नेपाल आर्मीमा भर्ती भएका थिए । काठमाडौँ चक्रपथ निर्माणको जिम्मेवारी सेनालाई दिँदा उनीपनि त्यस टोलीमा आवद्ध थिए । उनको २०६६ फागुन १६ मा निधन भएको थियो ।
ओलम्पिक संग्राहलयमा खेल क्षेत्रलाई विकास गर्न योगदान गर्ने खेलकर्मी र विभिन्न खेलाडीहरुको प्रतिमा स्थापना गर्ने लक्ष्य रहेता पनि स्व. गजराज जोशीको खेलकुदलगायत विभिन्न क्षेत्रमा गरिएको योगदानको कदर गर्दै उनको प्रतिमा स्थापना गरिएको नेपाल ओलम्पिक संग्राहलयका अध्यक्ष क्षितिज अरुण श्रेष्ठले बताए ।
उक्त अवसरमा गजराज जोशीका छोरा, नेपाल फुटभली संघका अध्यक्ष एवम् भेट्रान एथलेटिक्स खेलाडी मनिष जोशीलाई मानार्थ सदस्यता समेत प्रदान गरिएको थियो ।
प्रतिक्रिया