नेकपा (एस)को केन्द्रीय समिति बैठक पहिलो पटक बस्दै
नेकपा (एमाले)को स्थायी कमिटीको बैठकले आसन्न विधान महाधिवेशनमा पेस गरिने विधान संशोधन प्रस्ताव, राजनीतिक र साङ्गठनिक प्रतिवेदनलाई यही असोज ८ र ९ गते बस्ने केन्द्रीय कमिटी बैठकमा पेस गर्ने तय गरेको छ । सो पार्टीका प्रचार विभाग प्रमुख योगेश भट्टराईका अनुसार छलफलका लागि प्रस्ताव केन्द्रीय कमिटीमा पेस गर्ने निर्णय भएको छ ।
ललितपुरको च्यासलस्थित तुल्सीलाल स्मृति भवनमा आइतबार सुरु भई आज सोमबार सम्पन्न स्थायी कमिटीको बैठकले ती प्रतिवेदनमा स्थायी कमिटीका सदस्यको सुझाव लिने क्रम सकाएको हो ।
यही असोज १५ देखि १७ गते हुन ललितपुरको गोदावरीमा विधान महाधिवेशन हुँदैछ ।
एमालेकोे केन्द्रीय कमिटीको गत साउन २५ मा सम्पन्न केन्द्रीय कमिटीको बैठकको निर्णयका आधारमा तयार विधानको मस्यौदा प्रस्ताव मातहतका कमिटीमा सुझावका लागि पठाएको थियो । विधानमा पार्टीको प्रमुख पदमा उमेर हद, कमिटीहरुमा निर्वाचन प्रणाली, सङ्घीयता अनुकूलका व्यवस्थामा छलफल भइरहेको जनाइएको छ ।
प्रतिवेदनमा स्थायी कमिटीका प्राप्त सुझावका आधारमा एमालेको दशौँ राष्ट्रिय महाधिवेशन आगामी मङ्सिर १० देखि १२ गतेसम्म हुने तय गरिएको सो पार्टीले जनाएको छ ।
यस्तै, एक महिना अगाडि नेपाल कम्युनिष्ट पार्टी (एमाले) बाट माधव नेपालको नेतृत्वमा अलग भएको समूहले स्थापना गरेको नेपाल कम्युनिष्ट पार्टी (एकीकृत समाजवादी) को केन्द्रीय समिति बैठक आज (असोज ५) काठमाडौंमा बस्ने भएको छ । उक्त पार्टीको पहिलो पटक केन्द्रीय समिति बैठक बस्न लागेको हो ।
बुधबारसम्म बस्ने बैठकमा समसामयिक राजनीतिक विषयवस्तु, देशभर सङ्गठन विस्तारका लागि आवश्यक रणनीतिमा छलफल गरिने बताइएको छ । सो बैठकमा पार्टीका विभिन्न विभाग, जनवर्गीय सङ्गठन, सम्बन्धित आयोगका गठन, पुनः गठन, विस्तार तथा सुदृढीकरणका लागि आवश्यक छलफल गरिने सो पार्टीका केन्द्रीय सदस्य दिलुकुमारी पन्तले जानकारी दिएकी छन् ।
बैठकमा सरकारलाई सफल बनाउन पार्टीले निर्वाह गर्नुपर्ने भूमिका, सरकारमा सहभागिताको विषय, राजनीतिक सङ्गठन प्रबद्र्धनका लागि राष्ट्रियस्तरमा के कसरी अभियान सञ्चालन गर्ने भन्ने विषयमासमेत छलफल हुने जनाइएको छ ।
११३ केन्द्रीय सदस्यको सहभागिता हुने उक्त बैठकले केही नेताको विभाग हेरफेर गर्ने केही नेतालाई नयाँ जिम्मेवारी तोक्न सक्ने अनुमान गरिएको छ । सो पार्टीले अहिलेसम्म देशका ५५ जिल्लामा कार्यसमिति गठन गरेको दाबी गरिएको छ ।
file photo
प्रतिक्रिया