काङ्ग्रेसभित्र उत्पन्न असन्तुष्टिलाई समयमै सम्बोधन गर्न देउवा असफल भए भने दुई पटक काङ्ग्रेस विभाजन गराएको कलङ्क देउवामाथि लाग्ने निश्चित छ ।

सत्तारुढ दलहरू नेपाली काङ्ग्रेस र जनता समाजवादी पार्टीभित्र उत्पन्न अन्तरसङ्घर्षले सत्ता गठबन्धनलाई सङ्कटग्रस्त तुल्याउने सम्भावना देखापरेको छ । माधवकुमार नेपाल नेतृत्वको समूहभित्र उत्पन्न विवादले गठबन्धनको स्थायित्वमाथि आशङ्का पैदा गरिरहेका बेला काङ्ग्रेस र जसपाभित्रको अन्तरसङ्घर्षले नयाँ समस्या थपेको छ ।

जसपामा उपेन्द्र यादवले महेन्द्र यादव, राजकिशोर यादव र बाबुराम भट्टराईलगायतका नेताहरूसँग सामान्य परामर्शसमेत नगरिकन मन्त्रीका नाम सिफारिश गरेपछि उक्त पार्टीभित्र विवाद चर्किएको छ । बहुसङ्ख्यक सांसद मिलेर बेग्लै दल खडा गर्ने स्थितिमा उपेन्द्र यादवविरोधी जसपा नेताहरू पुगेका छन् । कदाचित्त जसपा विभाजित भयो भने असन्तुष्ट पक्षले नेकपा एमालेसँग सहकार्य गर्ने निश्चितप्रायः छ ।

त्यसैगरी, नेपाली काङ्ग्रेसको राष्ट्रवादी एवम् प्रजातन्त्रवादी धार पनि अब देउवाका विरुद्ध सङ्गठित प्रतिरोधमा उत्रिएको छ । माओवादीसँग चुनावी गठबन्धन गर्न नहुने ठहर काङ्ग्रेसको शेखर कोइराला पक्षले गरेको छ । काङ्ग्रेस एक्लै चुनावी मैदानमा उत्रिनुपर्छ भन्दै कोइराला पक्षले देउवाविरुद्ध सङ्गठित प्रतिरोध गर्ने तयारी गरेको छ । देउवा अटेर गरेर अघि बढे कम्युनिष्टसँग हुने चुनावी गठबन्धनलाई अस्वीकार र अवज्ञा गर्दै कोइराला पक्षले सबै (१६५) निर्वाचन क्षेत्रमा काङ्ग्रेसको उम्मेदवार बनाउन कुनै पनि विकल्प रोज्नसक्ने अवस्था छ ।

स्मरणीय छ, कम्युनिष्टहरूसँग गठबन्धन गर्दा काङ्ग्रेसले बढीमा पचासी निर्वाचन क्षेत्रमा आफ्ना उम्मेदवार खडा गर्न ‘भाग पाउने’ देखिन्छ । बाँकी असी या सोभन्दा बढी निर्वाचन क्षेत्रमा गैह्रकाङ्ग्रेसी उम्मेदवारलाई काङ्ग्रेस मतदाताहरूले मतदान गर्नुपर्ने हुन्छ । त्यस्तो अवस्थामा शेखर कोइराला पक्षले एमालेसँग मिलेर या नमिलिकन असी स्थानमै उम्मेदवारी दियो भने देउवा-माओवादी गठबन्धनको औचित्य नरहने स्पष्ट छ । काङ्ग्रेसभित्र उत्पन्न असन्तुष्टिलाई समयमै सम्बोधन गर्न देउवा असफल भए भने दुई पटक काङ्ग्रेस विभाजन गराएको कलङ्क देउवामाथि लाग्ने निश्चित छ ।