अपाङ्ता संरक्षण नेपालले आइतबार (मङ्सिर २५) आयोजना गरेको अन्तर्राष्ट्रिय अपाङ्गता दिवस कार्यक्रममा बीपी कोइराला फाउन्डेसनका सचिव तथा भारतीय राजदूतावासका प्रथम सचिव डा. साहिल कुमार पनि सहभागी भए ।
फाउन्डेसनका सचिव साहिलले दृष्टिविहीनहरूको सहयोगार्थ नेपालभर थप वितरणका लागि अपाङ्गता संरक्षण नेपालका अध्यक्षलाई ९ सय ५० थान सेतो छडी हस्तान्तरण गरे ।
बीपी कोइराला फाउन्डेसनको प्राथमिकताभित्र पर्ने एक क्षेत्र स्वास्थ्य पनि रहेको बताइएको छ । फाउन्डेसनले कोभिड-१९ को महामारीका बेला सुदूरपश्चिम प्रदेशमा सुरक्षा सामग्रीसमेत उपलब्ध गराएको थियो ।
ज्ञातव्य छ, भारत र नेपाल सरकारको संयुक्त पहलमा सन् १९९१ मा बीपी कोइराला फाउन्डेसनको स्थापना भएको हो । दुई राष्ट्रका संस्कृति र जनजीवनसँग सम्बन्धित बहुआयामिक पक्ष तथा कला, साहित्य, बौद्धिक सम्वादलाई प्रगाढ बनाउँदै भारत र नेपालबीचको सम्बन्धलाई थप मजबुत बनाउने फाउन्डेसनको उद्देश्य रहेको जनाइएको छ ।
प्रतिक्रिया