युरोपेली सङ्घबाट बेलायतको बहिर्गमन भएको दुई वर्षपछि बेलायतीहरू ब्रेक्जिट (बहिर्गमन)को पीडा महसूस गरिरहेको त्यहाँका व्यवसायीहरूले बताइरहेका छन् ।

“यसको लागत, बिना कुनै फाइदाको लागत बढेको छ“, मध्य इङ्ग्ल्याण्डस्थित रसायन कम्पनी रबिन्सन ब्रदर्सका प्रमुख कार्यकारी एड्रियन हानराहनको गुनासो एएफपीले उद्धृत गरेकोे छ ।

समस्या लन्डन र ब्रसेल्सबीच ब्रेक्जिटपछिको स्वतन्त्र व्यापार सम्झौताद्वारा धेरै हदसम्म हटाइएको छ। सीमा शुल्क समस्या नभएको तर नयाँ नियामक कागजी कार्यको बोझ समस्याका रूपमा देखिएको हो ।

“ईयूसँग कारोबार गर्न वा ईयूबाट सामानहरू प्राप्त गर्ने बदलिँदो कागजी प्रक्रियाको समस्याको समाधान गर्न हामीले हाम्रो प्रशासनिक खर्चमा सम्भवत: २५ प्रतिशत थप गरेका छौँ,” हानराहनले भनेका छन् ।

खाद्य, इलेक्ट्रोनिक्स, फार्मास्युटिकल र अन्य फर्महरूको विभिन्न क्षेत्रहरूले प्रयोग गर्ने रसायनहरू उत्पादन गर्ने यस कम्पनीमा २६५ जनाले रोजगारी पाएका छन् ।

रबिन्सन ब्रदर्सले आफ्नो उत्पादनको लगभग ७० प्रतिशत निर्यात गर्दछ, जसमध्ये आधाभन्दा बढी ईयूमा जान्छ ।

बेलायती चेम्बर्स अफ कमर्शले ब्रेक्जिटको परिणामसँग जुधिरहेको कम्पनी एक्लो नभएको र बेलायतका ५६ प्रतिशत व्यवसायले नयाँ व्यापारिक नियमसँग घुलमिल हुन कठिनाइको सामना गर्नुपरेको जनाएको छ ।

बीसीसीका महानिर्देशक शेवौन हाभिल्याण्ड भन्छन्, “व्यवसायीहरूले पर्खालमा टाउको ठोकेको महसुस गरिरहेका छन् किनभने उनीहरूलाई मद्दत गर्न केही गरिएको छैन । वर्तमान समस्याहरू जति लामो समयसम्म अनियन्त्रित हुन्छन्, त्यति नै धेरै ईयू व्यापारीहरू अन्यत्र जान्छन्, र अधिक क्षति हुन्छ ।”

प्रधानमन्त्री ऋषि सुनकको सरकारले उच्च मुद्रास्फीतिका कारण बेलायती अर्थतन्त्र मन्दीमा प्रवेश गरेको विश्वास व्यक्त गरेको छ ।

युक्रेनमा रूसले गरेको आक्रमणले ऊर्जाको मूल्यमा वृद्धि गरेको दावी गरिएको छ तर विश्लेषकहरुले ब्रेक्जिटले पनि लागत बढाएको दाबी गरेका छन् ।

‘लण्डन स्कुल अफ इकोनोमिक्स’का अनुसन्धाता निखिल दत्ताका अनुसार सन् २०१६ को ब्रेक्जिटपछि स्टर्लिंगको अवमूल्यनले उच्च मुद्रास्फीति निम्त्याएको गतिलो प्रमाण छ । अस्ट्रेलियासँग भएको व्यापार सम्झौताजस्ता नयाँ व्यापार सम्झौता ‘सानो’ भएको दत्ताको भनाइ छ ।

बैंक अफ इङ्ल्यान्डको मौद्रिक नीति समितिका सदस्य स्वाति धिंगराले गत महिना सांसदहरूसँग भनेकी थिइन्, ‘ब्रेक्जिटका कारण बेलायतको व्यापारमा अन्य विश्वको तुलनामा निकै ठूलो गिरावट आएको छ ।ु

किङ्स कलेज लण्डनका अर्थशास्त्री जोनाथन पोर्टेसका अनुसार ब्रेक्जिटले बेलायतको व्यापार १० देखि १५ प्रतिशतले घटाएको छ भन्नेमा एकमत छ ।

सरकारको आफ्नै आर्थिक पूर्वानुमान निकाय ओबीआरले ब्रेक्जिटले देशको दीर्घकालीन उत्पादनमा करिब चार प्रतिशतले कमी ल्याउने अनुमान गरेको छ ।

स्वास्थ्य, आतिथ्य र कृषिजस्ता क्षेत्रहरूमा ईयू कामदारहरू गुमाउनु जटिल विषय हो, यद्यपि स्वदेश फर्कनेहरूमध्ये केहीलाई गैर–ईयू देशहरूबाट कर्मचारीहरूले प्रतिस्थापन गरेका छन् ।

ब्रेक्जिटको पक्षमा मतदान गर्ने केही उच्च पदस्थ अधिकारीहरूले सरकारलाई अध्यागमनसम्बन्धी नयाँ र कडा नियमहरू खुकुलो बनाउन आग्रह गरिरहेका छन् ।

“आप्रवासनको सन्दर्भमा, यो निश्चित रूपमा मैले चाहेको ब्रेक्जिट होइन,” कपडा कम्पनी नेक्स्टका प्रमुख सिमोन वोल्फसनले गत महिना बीबीसीसँगको कुराकानीमा भनेका थिए । मदिरा व्यवसायी समूहका जेडी वेदरस्पूनका प्रमुख टिम मार्टिनको पनि धारणा वोल्फसनसँग मिल्दोजुल्दो छ ।

हनराहनका लागि ब्रेक्जिटको नतिजाले उहाँको कम्पनी बाँच्न सक्छ कि सक्दैन भन्ने प्रश्न उठाएको छ । यदि यो जारी रह्यो भने व्यवसायमा रहनको लागि हाम्रो प्रस्तावलाई संकुचित गर्नुबाहेक अर्को विकल्प छैन भन्ने उनको धारणा छ ।

“हामीसँग धेरै ठूला दुई वा तीन जर्मन ग्राहकहरू छन् जसले हामीलाई भनेका छन् कि उनीहरू अब हामीकहाँ आउने छैनन् किनभने उनीहरूका लागि बेलायतमा कसैसँग काम गर्न धेरै जटिल छ ।