‘विश्वको पाँचौं ठूलो जनसङ्ख्या भएको राष्ट्र निःशुल्क ज्ञान भण्डारमा पहुँचबाट बञ्चित’

‘निन्दनीय सामग्री’ प्रकाशन गरेको भन्दै पाकिस्तानी अधिकारीहरूले विकिपिडियाको वेबसाइटलाई सेन्सर गरेपछि पाकिस्तानमा उक्त वेबसाइटमाथि प्रतिबन्ध लगाइएको छ ।

मुस्लिम बाहुल्य पाकिस्तानमा धार्मिक गतिविधिको निन्दालाई एक संवेदनशील मुद्दा मानिन्छ र सामाजिक सञ्जाल फेसबुक र युट्युबलाई यसअघि पनि अपमानजनक सामग्री प्रकाशित गरेको आरोपमा प्रतिबन्ध लगाइएको थियो । यस सम्बन्धमा पाकिस्तान दूरसञ्चार प्राधिकरण (पीटीए)का प्रवक्ता मालाहत ओबैदले ‘धर्म र धार्मिक सन्दर्भमाथिको निन्दात्मक सामग्री हटाउन र समयसीमा पूरा गर्न पटक–पटक पत्राचार गर्दा पनि जवाफ नदिएपछि अनलाइन इन्साइक्लोपीडियालाई शुक्रबार देशभर बन्द गरिएको’ बयार जारी गरेका छन् ।

एएफपीले जनाएअनुसार पीटीएले विकिपिडियालाई सामग्री हटाउन ४८ घण्टाको अल्टिमेटम दिएको थियो । ‘उनीहरूले केही सामग्रीहरू हटाए तर सबै होइन, सबै आपत्तिजनक सामग्री नहटाएसम्म यो प्रतिबन्ध कायम रहनेछ,’ ओबैदको भनाइ छ ।

पाकिस्तानको यस कदमपछि विकिपिडियाको व्यवस्थापन गर्ने गैरनाफामूलक कोष, विकिपिडिया फाउन्डेसनले भनेको छ, ‘यो प्रतिबन्धले विश्वको पाँचौं ठूलो जनसङ्ख्या भएको राष्ट्रलाई सबैभन्दा ठूलो निःशुल्क ज्ञान भण्डारमा पहुँचबाट बञ्चित गरेको छ । यदि यो जारी रह्यो भने यसले सबैलाई पाकिस्तानको ज्ञान, इतिहास र संस्कृतिमा पहुँचबाट बञ्चित गर्नेछ ।’