उपप्रधानमन्त्रीसमेत रहेका गृहमन्त्री नारायणकाजी श्रेष्ठमाथि नक्कली भुटानी शरणार्थी प्रकरणसँग सम्बन्धित विषयलाई लिएर काबु पाउन नसक्ने देखिएपछि तीन पार्टीका तीन शीर्ष नेताहरूको परामर्शमा प्रहरीलाई नियन्त्रणमा राख्ने प्रयास भएको छ ।

प्राप्त जानकारीअनुसार प्रधानमन्त्री प्रचण्ड र रक्षामन्त्री पूर्णबहादुर खड्काले प्रहरी महानिरीक्षक वसन्त कुँवरलाई बालुवाटारस्थित प्रधानमन्त्री आवाशमा बोलाएर शरणार्थी प्रकरणमा कसैलाई पक्राउ गर्नुपर्ने भएमा त्यसअघि नै जानकारी गराउन दबाब दिएका छन् । बालकृष्ण पक्राउ परेको पर्सीपल्ट आइजीपी कुँवरलाई बालुवाटारमा बोलाएर स्पष्ट निर्देशन दिँदै पूर्ण खड्कालाई सँगै राखेर प्रचण्डले भनेका छन्- ‘अब आइन्दा कसैलाई पक्राउ गर्नुपर्ने भएमा पहिले मलाई जानकारी गराउनु, गृहमन्त्रीले आदेश दिएकै भरमा सोझै गएर कसैलाई पक्राउ नगर्नु ।’

यसरी रक्षामन्त्रीसमेत रहेका उपप्रधानमन्त्री खड्का र प्रधानमन्त्री प्रचण्डले आइजीपीलाई कसेपछि त्यसको असर अनुसन्धान र थप दोषीहरूको गिरफ्तारीमा परेको छ । प्रेमकुमार राई, महेश्वर न्यौपाने, राजेश बज्राचार्य, अजयक्रान्ती र राजेन्द्र स्थापितलगायतका ब्यक्तिहरूलाई पक्राउ गर्ने कार्य समयमै हुन नसक्नुको मुख्य कारण प्रचण्ड-पूर्णको आदेशलाई मानिएको छ । उनीहरू शरणार्थी प्रकरणलाई कुनै ठोस कारबाहीबिना नै सामसुम पार्ने योजनामा रहेको देखिएको छ ।

यो समयमा गृहमन्त्री परिवर्तन गर्दा जनतामा असन्तोष बढ्ने र असामान्य स्थिति पैदा गर्ने भएकोले प्रचण्ड र देउवा चाहेर पनि गृहमन्त्री बदल्न सक्ने अवस्थामा छैनन् । त्यसैले प्रहरीलाई निष्क्रिय तुल्याउँदै मुद्दा कमजोर बनाएर अदालतमा पेस गर्ने र थप दोषीहरूलाई पक्राउ नै नगरी शरणार्थी प्रकरणलाई विश्राम दिने योजनामा विपक्षीसहित सत्तापक्षीय नेताहरू लागिपरेका छन् !