गायिकाको परिचयलाई पुनःजीवित पार्दै अभिनेत्री गौरी मल्लले तीज विशेष गीत सार्वजनिक गरेकी छन् । राजधानीमा पत्रकार सम्मेलनको आयोजना गर्दै ‘धिन ताका नाका धिनु बोलको गीतको अडियो भिडियो सार्वजनिक गरिएको हो ।

बाल्यकालदेखि गायनमा सौखिन मल्लले वर्षौं पहिले दर्जनबढि गीत गाएकी थिइन् । उनले चलचित्र ‘भाइ’मा नायिका मेलिना मानन्धरको लागि पार्श्व गायन समेत गरेकी थिइन् । यद्यपि उनले आफ्नो गायन करियर भन्दा अभिनय करियरलाई नै अगाडी बढाएकी थिइन् । सार्वजनिक तीज गीतमा शब्द, सङ्गीत र स्वर दिँदै उनी गायनमा फर्किएकी छन् । उनले आफ्नै नामबाट यूट्युब च्यानल समेत शुभारम्भ गरेकी छन् ।

यस गीतको भिडियोमा गौरी आफैले अभिनय गरेकी छन् । गौरीसँगै अभिनेत्री मिथिला शर्माले पनि यसमा अभिनय गरेकी छन् । साथमा समाइरा श्रेष्ठ, तेन्जु योन्जन, निलम पौडेल, सिम्रन शेरचन लगायतको अभिनय रहेको छ । भिडियोलाई सन्तोष राजबाहकले कोरियोग्राफी तथा निर्देशन गरेका छन् । अञ्जु पोखरेल दाहाल म्यूजिक भिडियोकी निर्माता हुन् भने सुवास दाहालले निर्माण संयोजन गरेका छन् । उत्सव दाहालको छायाङ्कन र विकास दाहालको सम्पादन रहेको छ ।

गीत सार्वजनिक कार्यक्रममा मल्ल उत्साहित र भावुक बनिन् । उनले आफ्नी आमालाई सो कार्यक्रममा निम्त्याएकी थिइन् । वरिष्ठ कलाकार मदनकृष्ण श्रेष्ठ, वरिष्ठ अभिनेत्री बसुन्धरा भुषाल, वरिष्ठ गीतकार करुण थापा, वरिष्ठ नृत्य निर्देशक वसन्त श्रेष्ठ लगायत अतिथिको रुपमा उपस्थित थिए । कार्यक्रममा कलाकार मदनकृष्ण श्रेष्ठले नृत्य, गायन र अभिनय तीन वटै कलामा पोख्त रहेकाले गौरीलाई नाट्यश्वरीकी छोरी रहेको बताउँदै नयाँ यात्राको शुभकामना दिए । अभिनेत्री बसुन्धरा भुषालले आफ्नो परिस्थितिले साथ नदिँदा यस गीतमा अभिनय गर्न नपाएको बताइन् । अभिनेत्री मिथिला शर्माले सबै काम छोडेर यस गीतमा अभिनयको लागि तत्कालै राजी भएको जानकारी दिइन् ।

अभिनेतृ एवम् गायिका मल्लले आफ्नो गायन यात्राबारे स्मरण गर्दै गायिका रचना रिमालले समय दिन नसकेपछि रेकर्डिष्ट डिजे एलएक्सले प्रेरणा दिई आफैलाई गाउन लगाएको खुलासा गरिन् । उनले आफुमा यसरी गाउन सक्छु भन्ने हिम्मत नरहेको तर सफल भएको बताइन् । उनले अब गायनमा निरन्तरता दिने प्रतिबद्धता पनि जनाइन् । कार्यक्रममा म्यूजिक भिडियोमा योगदान गर्ने टीमलाई कदरपत्र प्रदान गरिएको थियो ।