कमल थापाले पनि प्रसाईंको आन्दोलनमा समर्थन जनाए

मेडिकल ब्यावसायी दुर्गा प्रसाईंको नेतृत्वमा आज शुक्रबार पनि काठमाडौंमा प्रदर्शन हुने भएको छ । आज तीनकुनेलाई केन्द्र बनाएर आन्दोलन जारी राखिने प्रसाईंले जनाएका छन् ।

‘ब्यवस्था परिवर्तन नभएसम्मका आन्दोलन जारी रहने उद्घोष गरेका प्रसाईंले काठमाडौंमा मात्र आन्दोलन केन्द्रित गर्ने नभइ उपत्यकाबाहिर ७७ जिल्लामा नै क्रमशः विस्तार हुने जिकिर गरेका छन् ।

बिहीबार बल्खुमा भएको प्रदर्शनमा प्रहरीले हस्तक्षेप गर्दा १३ जना घाइते भएको जनाउँदै प्रसाईंले भनेका छन्, ‘सबै मिसन ८४ भनेर लागेका छन् तर हामी मिसन टुडेमा छौँ र हामीले यो ब्यबस्था परिवर्तन गरिछाड्ने छौँ ।’

उनको नेतृत्वमा हिजो भएको प्रदर्शनमा हजारौँ मानिसहरु बल्खुमा उपस्थित भएर समर्थन जनाएका थिए ।

यसैबीच काठमाडौंमा ‘ब्यवस्थाविरोधी’ आन्दोलन गरिरहेका प्रसाईंनेतृत्वको आन्दोलनलाई राप्रपा नेपालका अध्यक्ष कमल थापाले पनि समर्थन जनाएका छन् ।

संघीय गणतन्त्रको नाउँमा कायम भ्रष्ट व्यवस्थाको अन्त्य, राजसंस्था र हिन्दुराष्ट्रको स्थापना तथा संघीयताको खारेजीको माग राखेर राजधानी काठमाडौंमा भएको प्रदर्शन एवं जनआवाजलाई अवमूल्यन नगर्न, उपेक्षा नगर्न र दमन नगर्न सरकारसँग आग्रह गर्दछु, राजसंस्था र हिन्दुराष्ट्रको पक्षमा देखिएको जनलहरको म उच्च सम्मान गर्दछु,’ थापाले भनेका छन्, ‘जनताको आवाज र भावनाको सम्मान गर्दै सर्वपक्षीय सहमतिको आधारमा राजासहितको प्रजातन्त्र तथा सर्वधर्म समभाव र पूर्ण धार्मिक स्वतन्त्रतासहितको सनातन हिन्दूराष्ट्र स्थापना गर्ने पहलकदमी शुरु गर्न सरकार र प्रमुख राजनीतिक दलहरुको ध्यानाकर्षण गर्दछु।’

बिहिवार भएको शान्तिपूर्ण प्रदर्शनमा प्रशासनिक दमनको परिणाम स्वरूप केही प्रदर्शनकारी घाइते भएको सुन्दा दुःख लागेको जनाउँदै उनले घाइतेहरुको शिघ्र स्वास्थलाभको कामनासमेत गरेका छन् ।

‘साथै, आगामी दिनमा सर्वसाधारण जनतालाई कठिनाइ नहुने र विद्यार्थीहरुको पढाईलाई असर नपर्ने गरी शान्तिपूर्ण ढंगबाट प्रदर्शन संचालन गर्न आयोजकहरुमा अनुरोध गर्दछु,’ उनको आग्रह छ, ‘राजसंस्था र हिन्दुराष्ट्र चाहनेहरु हिंसा र तोडफोडमा विश्वास गर्दैनन् भन्ने सन्देश दिनुपर्छ।’