५५ वर्षअघि अन्तरिक्षबाट ऐतिहासिक ‘अर्थराइज’ फोटो खिच्ने पूर्व अमेरिकी अन्तरिक्षयात्री विलियम एन्डर्सको ९० वर्षको उमेरमा विमान दुर्घटनामा मृत्यु भएको छ।

एन्डर्स सानो विमान उडाउँदै गर्दा शुक्रबार (७ जुन) बिहान वासिङ्टन राज्यको तटमा दुर्घटनाग्रस्त भएको उनका छोराले अमेरिकी मिडियालाई बताएका छन् । विमानमा एन्डर्स एक्लै रहेका बताइएको छ ।

शेरिफ एरिक पिटरले दुर्घटना क्षेत्रमा खोजी भइरहेको तर अहिलेसम्म शव फेला नपरेको बताएका छन् ।

डिसेम्बर १९६८ मा अपोलो-८ मिसनको सदस्य, एन्डर्स उहाँका समकक्षी फ्रान्क बोर्मन र जेम्स लभेलसँगै चन्द्रमामा पुग्ने पहिलो व्यक्ती मध्ये एक थिए ।

चन्द्रमाको एउटा कक्षबाट एन्डर्सले अन्तरिक्षको विशाल अन्धकार छिचोल्दै चम्किलो निलो पृथ्वीको फोटो खिचेका थिए । ‘अर्थराइज’ नामक उक्त तस्बिर प्रमुख ऐतिहासिक छविहरूको राउन्डअपमा सूचीबद्ध गरिएको छ, र लाइफ म्यागजिनको पुस्तक ‘संसार बदलेको १०० तस्बिर’हरुको सूचीमा समावेश गरिएको थियो ।

‘सन् १९६८ मा अपोलो-८ को समयमा बिल एन्डर्सले मानवतालाई अन्तरिक्ष यात्रीले दिन सक्ने सबैभन्दा ठुलो उपहार प्रदान गरेका थिए’, नासाका प्रमुख बिल नेल्सनले सामाजिक सञ्जाल एक्समार्फत बताएका छन् ।

सन् १९३३, अक्टोबर १७ मा हङकङमा जन्मिएका एन्डर्सले अन्तरिक्ष यात्रीको रूपमा आफ्नो समयपछि विभिन्न प्रविधि-सम्बन्धित सरकारी पदहरू सम्हाले । आणविक नियामक आयोगको पहिलो अध्यक्ष बनेका उनले पछि नर्वेका लागि अमेरिकी राजदूतको रूपमा पनि सेवा गरेका थिए ।