राष्ट्रपति बाइडेनको उमेर र मानसिक तीक्ष्णताको बारेमा थप चिन्ता

अमेरिकी राष्ट्रपति जो बाइडेनले बिहीबार (११ जुलाई) नाटो शिखर सम्मेलनमा युक्रेनका राष्ट्रपति भोलोदिमिर जेलेन्स्कीलाई गल्तीले रूसी नेता भ्लादिमिर पुटिनको रूपमा परिचय गराएका छन् ।

तथापि, आफ्नो बोली चुक्नेवित्तिकै ८१ वर्षीय राष्ट्रपतिले तुरुन्तै आफूलाई सच्याएका थिए । राष्ट्रपति जेलेन्स्कीले यसको प्रतिक्रियामा आफू पुटिनजस्तो नभइ एक ‘असल’ युक्रेनी नेता भएको जिकिर गरे ।

दुई साताअघि डोनाल्ड ट्रम्पविरुद्धको कमजोर बहस प्रदर्शनपछि बाइडेनको उमेर र मानसिक तीक्ष्णताको बारेमा चिन्ता बढेको छ ।

‘अब म यसलाई दृढ सङ्कल्प भएका युक्रेनका राष्ट्रपति पुटिनलाई हस्तान्तरण गर्न चाहन्छु, बाइडेनले वासिङ्टनमा शिखर सम्मेलनमा नाटो-युक्रेन सम्झौताको घोषणामा भनेका थिए । राष्ट्रपति बाइडेन तुरुन्तै आफूलाई सच्याउँदै भने, ‘राष्ट्रपति जेलेन्स्कीले राष्ट्रपति पुटिनलाई पराजय गर्नेछन् ।… ‘

बाइडेनका रिपब्लिकन प्रतिद्वन्द्वीहरूले केही मिनेटभित्रै उनको उक्त क्लिप प्रसारण गर्न थालेका छन् ।