पाकिस्तान प्रहरीले कारागारमा रहेका पूर्वप्रधानमन्त्री इमरान खानको पार्टी मुख्यालयमा छापा मारेको छ । पाकिस्तानको सैन्यसमर्थित सरकारले राजनीतिक आन्दोलनमा प्रतिबन्ध लगाउने वाचा गरेको एक हप्तापछि सोमबार (२२ जुलाई) खानको पार्टी कार्यालयमा छापा मारेको हो ।

खानको पाकिस्तान तहरिक-ए-इन्साफ (पिटिआई)को मुख्यालयलाई अधिकारीहरूले सिल गरेको, पार्टीका धेरै कार्यकर्तालाई प्रतीक्षा भ्यानमा लिएर गएको एएफपीले जनाएको छ । मिडियामा बोल्ने अधिकार नभएको भन्दै नाम उल्लेख नगर्ने शर्तमा इस्लामाबाद प्रहरीका एक अधिकारीले पार्टीका संस्थापक सदस्य र प्रेस विभागका प्रमुख रउफ हसनलाई गिरफ्तार गरिएको जनाएका पनि समाचारमा उल्लेख गरिएको छ ।

सरकारका सूचनामन्त्रीले गत साता पिटिआईमाथि प्रतिबन्ध लगाइने बताएका थिए । त्यसको केही दिनपछि सर्वोच्च अदालतले पार्टीको पक्षमा महत्त्पूर्ण फैसला सुनाएपछि सरकारलाई ठूलो झट्का लागेको थियो ।

पूर्वप्रधानमन्त्री खान करिब एक वर्षदेखि कारागारमा हुनुहुन्छ तर यसै महिना इस्लामाबादका एक न्यायाधीशले उहाँको अवैध विवाहको सजायलाई उल्ट्याइदिएका छन् । सर्वोच्च अदालतले पिटिआईलाई राष्ट्रियसभामा सबैभन्दा ठूलो पार्टी बनाउने कदमका रूपमा थप संसदीय सिटहरू प्रदान गरेको छ ।

गठबन्धन बनाएर फेब्रुअरीको निर्वाचनपछि संसदीय बहुमत हासिल गर्नुभएका प्रधानमन्त्री शहबाज शरिफको सरकारलाई यी दुवै मामिलाले ठूलो आघात पुगेको मानिएको छ ।

पाकिस्तानको मानवाधिकार आयोगले पिटिआईमाथि प्रतिबन्ध लगाउने प्रयासलाई ‘लोकतान्त्रिक मानकका लागि ठूलो प्रहार’ भन्दै यसलाई ‘राजनीतिक उदासीनताको गन्ध’ भनेको छ । आयोगका अध्यक्ष असद इकबाल बटले विज्ञप्तिमा भनेका छन्, ‘यसलाई अगाडि बढाइयो भने यसबाट गहिरो ध्रुवीकरण र राजनीतिक अराजकता तथा हिंसाको प्रबल सम्भावनाबाहेक अरु केही हासिल हुनेछैन ।’

सत्तामा फर्किनबाट रोक्न आफूमाथि धेरै मुद्दा दर्ता गरिएको बताउने पूर्वप्रधानमन्त्री खान विरोध प्रदर्शन र भ्रष्टाचार भड्काएको आरोपमा कारागारमा छन् ।

‘खानलाई हिरासतमा राख्ने कुनै आधार नभएको र यसको उद्देश्य उनलाई राजनीतिक पदका लागि अयोग्य घोषित गर्नका लागि थियो जस्तो देखिएको’ संयुक्त राष्ट्रसङ्घका विज्ञहरूको एक प्यानलले यसै महिना बताएको थियो ।