गत सोमबारदेखि लेबनानमा इजरायलले गरेको आक्रमणमा अहिलेसम्म ५५८ जनाको मृत्यु भएको जनाइएको छ । मृत्यु हुनेमा ५० बालबालिका र ९४ महिला समेत रहेका लेबनानका स्वास्थ्यमन्त्री फिरास अबियादले जानकारी दिएका छन् ।

इजरायली हवाई हमलाका कारण लेबनानमा अहिलेसम्म १८ सय ३५ जना घाइते भएका छन् । इजरायलले लेबनानमा रहेका हिजबुल्लाहका केन्द्रहरुमा भिषण आक्रमण शुरु गरेको छ । आक्रमणपछि दक्षिणी लेबनानमा हजारौं मानिस विस्थापित भएको मिडिया रिपोर्टमा उल्लेख छ ।

अहिलेसम्म हवाई हमलामा विस्थापित भएका १६ हजार ५०० जनालाई १५० विद्यालयमा राखिएको बताइएको छ ।

इजरायलले घरनजिकै हतियार राखिएको ठाउँ छाड्न सर्वसाधारणलाई आग्रह गरेको छ । हिजबुल्लाहले हतियारहरू इजरायलविरुद्ध प्रयोग गर्न चाहेको र त्यसको सुरक्षाका लागि लेबनानी जनतालाई मानव ढाल बनाएको आरोप इजरायलले लगाएको छ ।