क्यानडा सरकारले आफ्नो राजदूतमाथि छानबिन गर्ने पत्र पठाएपछि भारतले राजदूत सञ्जय कुमार बर्मालाई फिर्ता बोलाएको छ । क्यानडाले निशाना बनाएका राजदूत बर्मासहित अन्य उच्च कूटनीतिज्ञहरुलाई पनि भारतले फिर्ता बोलाएको छ ।

भारतको विदेश मन्त्रालयले जारी गरेको विज्ञप्तिमा क्यानडा सरकारमाथि विश्वास नगर्ने उल्लेख गर्दै राजदुतमाथि क्यानडाको आरोपलाई राजनीतिबाट प्रेरित भएको बताएको छ । भारत सरकारले यी आरोपहरूलाई पूर्ण रूपमा अस्वीकार गर्दै आरोपहरु ट्रुडो सरकारको राजनीतिक एजेन्डा भएको र भोटबैंकबाट प्रेरित रहेको जिकिर गरेको छ ।

विदेश मन्त्रालयले क्यानाडाका प्रधानमन्त्री जस्टिन ट्रुडोले सेप्टेम्बर २०२३ मा केही आरोप लगाएका थिए, तर क्यानडा सरकारले पटकपटक सोध्दा पनि भारत सरकारसँग एउटा प्रमाण पनि नदिएको र नयाँ आरोप पनि यस्तै ढंगले लगाइएको बताएको छ ।

जुन १८, २०२३ को साँझ क्यानडाको सरे शहरको गुरुद्वाराबाट निस्कने क्रममा क्यानडियन नागरिक (पूर्व भारतीय) हरदिप सिंह निज्जरको गोली हानी हत्या गरिएको थियो । गत वर्ष सेप्टेम्बर १८ मा क्यानडाका प्रधानमन्त्री ट्रुडोले निज्जरको हत्यामा भारत सरकारको संलग्नता रहेको आरोप लगाएका थिए जसलाई भारतले अस्वीकार गरेको थियो । त्यसपछि निज्जर हत्याका तीन अभियुक्त पक्राउ परेका थिए । आरोपित तीनै जना भारतीय नागरिक हुन् ।